Senatta TMD elderi qarýly kúshteriniń yntymaqtastyǵyn jetildirý jónindegi qujattar qaralady

NUR-SULTAN. QazAqparat - Palata Spıkeri Máýlen Áshimbaevtyń tóraǵalyq etýimen Bıýro otyrysy ótip, onda depýtattar bıylǵy 7 qazanyna josparlanǵan Senat otyrysynyń kún tártibin bekitti, dep habarlaıdy QazAqparat.

«Otyrystyń kún tártibine «Táýelsiz Memleketter Dostastyǵyna qatysýshy memleketter qarýly kúshteriniń birlesken gýmanıtarlyq mınasyzdandyrý ınjenerlik bólimshesi týraly kelisimdi ratıfıkatsııalaý týraly» jáne «Táýelsiz Memleketter Dostastyǵyna qatysýshy memleketter qarýly kúshteriniń birlesken (birikken) baılanys júıesi týraly kelisimdi ratıfıkatsııalaý týraly» eki zań jobasy engizildi», - delingen Senat baspasóz qyzmetiniń málimetinde.

Birinshi kelisimdi ratıfıkatsııalaý Birlesken bólimsheni qalyptastyrý, qoldaný jáne onyń qyzmetin aıaqtaý tártibin, qabyldaýshy ne tranzıttik taraptyń aýmaǵyndaǵy onyń mártebesin, sondaı-aq gýmanıtarlyq mınasyzdandyrýdy júrgizý kezeńindegi taraptardyń áskerı qyzmetshileriniń mártebesin aıqyndaıdy. Birlesken baılanys júıesi týraly kelisimdi ratıfıkatsııalaý óz kezeginde, Kelisimge qatysýshy elderdiń Qarýly kúshteri baılanys júıeleriniń jumys isteý tıimdiligin arttyrýǵa yqpal etetin bolady.

Bıýro otyrysynda sonymen qatar Májilisten buryn kelip túsken «Kaspıı teńiziniń teńiz ortasyn qorǵaý jónindegi negizdemelik konventsııaǵa Kaspıı teńizin jerústi kózderinen jáne qurlyqta júzege asyrylatyn qyzmet nátıjesinde lastanýdan qorǵaý jónindegi hattamany ratıfıkatsııalaý týraly», «Kaspıı teńiziniń teńiz ortasyn qorǵaý jónindegi negizdemelik konventsııaǵa Bıologııalyq áralýandylyqty saqtaý týraly hattamany ratıfıkatsııalaý týraly» jáne «Qazaqstan Respýblıkasynyń keıbir zańnamalyq aktilerine qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» zań jobalary Senattyń salalyq komıtetterine berildi.