Senatta Táýelsizdik kúnine oraı saltanatty jıyn ótti

NUR-SULTAN. QazAqparat - Qazaqstan Respýblıkasy Táýelsizdiginiń 30 jyldyǵy qarsańynda Senat Tóraǵasy Máýlen Áshimbaev senatorlar men Palata Apparatynyń qyzmetkerlerine memlekettik marapattardy tabys etti, dep habarlaıdy QazAqparat joǵary palatanyń baspasóz qyzmetine silteme jasap.

Senat Tóraǵasy saltanatty jıyn barysynda qatysýshylardy Táýelsizdik kúnimen quttyqtap, elimizdiń ótken kezeńdegi basty jetistikterine toqtaldy. Máýlen Áshimbaev memlekettiń zańnamalyq bazasyn nyǵaıtý boıynsha atqarylǵan jumystar týraly da aıtty.

«Qazaqstan Elbasy saıasatynyń arqasynda Táýelsizdik jyldarynda eleýli tabystarǵa qol jetkizdi. Bıliktiń sabaqtastyǵy bizge qol jetkizgen jetistikterimizdi saqtaýǵa jáne odan ári órkendeı berýge múmkindik berdi. Senat búgingi tańda Prezıdentimizdiń elimizdi jańǵyrtý baǵdaryn zańnamalyq qoldaý turǵysynda belsendi jumys istep keledi», - dedi Máýlen Áshimbaev.

Senat depýtattarynan Palata Tóraǵasynyń orynbasary Nurlan Ábdirov – ІІІ dárejeli «Barys» ordenimen, Palata Tóraǵasynyń orynbasary Asqar Shákirov, senatorlar Dáýren Ádilbekov, Nurlan Beknazarov, Nurtóre Júsip, Saǵyndyq Luqpanov pen Abdaly Nuralıev – «Parasat» ordenimen, Olga Býlavkına men Lázzat Rysbekova – «Qurmet» ordenimen marapattaldy.

Senat Apparaty qyzmetkerlerinen bólim meńgerýshileri Kanalbek Raıymbekov, Nıkolaı Týretskıı «Qurmet» ordenimen, bólim meńgerýshisiniń orynbasary Erbol Ábdirasylov – «Eren eńbegi úshin» medalimen, bas konsýltanttar Elmıra Muhametjanova jáne Bolat Omar Qazaqstan Respýblıkasynyń Qurmet gramotasymen marapattaldy.