Senatta sý tasqynyna daıyndyq máseleleri jóninde Úkimet saǵaty ótedi
ASTANA. KAZINFORM – Senat Spıkeri Máýlen Áshimbaev Palata Bıýrosynyń otyrysyn ótkizdi.
Onda depýtattar osy aptada ótetin is-sharalardy pysyqtady jáne 30 qańtar kúni bolatyn Senat otyrysynyń kún tártibin belgiledi.
Soǵan sáıkes aldaǵy beısenbide Palata depýtattary «2014 jylǵy 29 mamyrdaǵy Eýrazııalyq ekonomıkalyq odaq týraly shartqa Eýrazııalyq ekonomıkalyq odaqqa múshe memleketterdiń arasynda kedendik ákelim bajdarynyń somasyn aýdarýǵa qatysty bólikte ózgerister engizý týraly hattamany ratıfıkatsııalaý týraly» zańdy qaraıdy. Bul qujattyń normalary sanktsııalyq shekteýler jaǵdaıynda Eýrazııalyq ekonomıkalyq odaq aıasynda kedendik bajdardy ákimshilendirýdi júzege asyrý kezindegi kedergilerdi joıýǵa baǵyttalǵan.
Sondaı-aq senatorlar «Qazaqstan Respýblıkasynyń keıbir zańnamalyq aktilerine baılanys qyzmetterin kórsetý, memlekettik satyp alý, kólik jáne poshta máseleleri boıynsha ózgerister men tolyqtyrýlar engizý týraly» zańdy birinshi oqylymda qaraıdy. Atalǵan zań tıisti salalardaǵy zańnamany odan ári jetildirýdi jáne memlekettiń aqparattyq qaýipsizdigin arttyrýdy kózdeıdi. Zań normalaryna sáıkes poshta operatorlary úshin mynadaı múmkindikter belgilenedi: paroldi (pın-kodty) engizip, quqyqty rastaý arqyly adresattyń kelisimin ala otyryp, poshta jóneltilimin úshinshi tulǵalarǵa tapsyrý, pochtomattardy ornalastyrý tártibin naqtylaý, ulttyq poshta operatoryna zań talaptaryna sáıkes dárilik zattar men medıtsınalyq buıymdardy tasymaldaý jáne saqtaý quqyǵyn berý.
Sonymen qatar osy aptada Senatta kóktemgi sý tasqynyna daıyndyq máseleleri jóninde Úkimet saǵaty ótedi. Onda depýtattar mınıstrlikterdiń, jergilikti atqarýshy organdardyń jáne múddeli taraptardyń ókilderimen birlesip, byltyrǵy tasqynnyń sebepteri men saldaryn, aldaǵy kóktemde eldi mekenderdi, onyń ishinde ózender men sý qoımalarynyń janynda ornalasqan aýyl-aımaqty sý basýdyń aldyn alý máselelerin jáne halyq pen úı sharýashylyqtaryn qoldaý sharalaryn talqylaıdy.
Budan basqa, Palatanyń bul aptadaǵy josparynda ekonomıkany damytý, eksporttyq-kredıttik agenttiktiń qyzmeti jáne basqa da mańyzdy máseleler boıynsha múddeli memlekettik organdardyń ókilderimen kezdesýler qarastyrylǵan. Memleket basshysynyń Joldaýda bergen tapsyrmalaryn oryndaý jáne Parlamenttik tyńdaýǵa daıyndyq aıasynda Senattyń salalyq komıtetteri «Eńbek adamy — ulttyq ekonomıkanyń ósýi jáne ult órkendeýiniń negizi», sondaı-aq, «Qazaqstan Respýblıkasyndaǵy ormandardy molyqtyrý jáne orman sharýashylyǵyn damytý» taqyryptaryna arnalǵan otyrystar ótkizedi.
Odan bólek, Bıýro otyrysynda buǵan deıin Májilisten kelip túsken zańdar jumys úshin Senattyń turaqty Komıtetterine bólinip berildi.
Osyǵan deıin Senatta depýtattardyń óńirlerde jergilikti turǵyndarmen kezdesýleri qorytyndylandy.