Senatta sý tasqynyn boldyrmaý máseleleri talqylandy
ASTANA. QazAqparat - Senattyń Halyqaralyq qatynas, qorǵanys jáne qaýipsizdik komıtetiniń músheleri sý tasqynyn boldyrmaý máselelerin talqylady. Bul týraly QazAqparat Senattyń baspasóz qyzmetine silteme jasap habarlaıdy.
Parlament Senatynda Halyqaralyq qatynas, qorǵanys jáne qaýipsizdik komıtetiniń músheleri azamattyq qorǵanys, atap aıtqanda sý qaýipsizdigin qamtamasyz etý jáne kóktemgi sý tasqynyna daıyndyq máseleleri boıynsha memlekettik organdardyń ókilderimen kezdesti.
Komıtet tóraǵasy Darıǵa Nazarbaeva máseleniń mańyzyn atap óte kelip, memlekettik organdar jumysyndaǵy birqatar júıeli olqylyqtarǵa nazar aýdardy. Sonyń saldarynan yqtımal sý tasqyny kútpegen apatqa ulasatyny aıtyldy. «Bul rette birqatar máseleler oryn alyp otyr: ýákiletti organdarda mamandardyń azdyǵy jáne tolyq emestigi, gıdrometeorologııa qyzmetindegi qarjy jetispeýshiligi, gıdrotehnıkalyq qurylystardyń durys jobalanbaýy, sý basý qaýpi bar ýchaskelerde eldi mekenderdiń zańsyz salynýy jáne basqa da kóptegen máseleler bar», - dedi senator.
D.Nazarbaevanyń pikirinshe, gıdrotehnıkalyq qurylystardy qaýipsiz paıdalaný salasyndaǵy túrli mekemelerdiń quqyqtyq aktilerindegi kelispeýshilik, kópfaktorly taldaý ótkizý merzimderin qaıta qaraý máseleleri sheshimin tappaǵan.
Sý tasqynynyń saldaryn aldyn alý jónindegi júzege asqan jáne qabyldanyp otyrǵan sharalar týraly ishki ister mınıstriniń orynbasary ıÝrıı Ilın, aýyl sharýashylyǵy mınıstriniń orynbasary Arman Evnıev, Aqmola oblysy ákiminiń orynbasary Vasılıı Krylov, Shyǵys Qazaqstan oblysy ákiminiń orynbasary Serik Aqtanov baıandama jasady.
ІІM málimetterine sáıkes, qurylystar elimizdiń túgelge jýyq óńirlerinde tótenshe jaǵdaı qaýpin eskermesten jáne sý qorǵaý beldeýleri men aımaqtary sheginde salynady. Sondaı-aq ıesiz jatqan 29 gıdrotehnıkalyq stantsııalardyń máseleleri sheshilmegen jáne sońǵy 3 jyldyń ishinde Atyraý, Mańǵystaý jáne Qostanaı oblystary jergilikti atqarýshy organdarynyń habarlaý júıesin jańartýǵa qarjy bólinbegen.
Ǵalymdar men saraptama qoǵamdastyqtarynyń ókilderi depýtattarǵa sý qaýipsizdigin qamtamasyz etý máseleleri týraly aıtyp berdi. Memleketaralyq sý sharýashylyǵyn úılestirý komıssııasy Ǵylymı-aqparattyq ortalyǵynyń dırektory Narıman Qypshaqbaevtyń aıtýynsha, atalǵan máselelerdiń ishinde ulttyq jáne jergilikti deńgeılerde sý basqarý mártebesin arttyrý kezek kúttirmes másele bolyp tabylady. Ol Qazaqstan Respýblıkasy Prezıdentiniń janyndaǵy Ulttyq sý keńesin jáne Úkimet janyndaǵy Sý resýrstary agenttigin qurýdy usyndy.
D.Nazarbaeva ǵalymdardyń usynysyna qoldaý bildirdi. «Biz, barlyq depýtattar osy máseleniń sheshilýine bir aýyzdan qol jetkizýimiz qajet», - dep atap ótti senator.
Parlament Senatynyń Halyqaralyq qatynas, qorǵanys jáne qaýipsizdik komıteti ótken jylǵy naýryz aıynda sý tasqynyna baılanysty tótenshe jaǵdaılardyń aldyn alý úshin usynymdar bergen bolatyn. Alaıda, senatorlar ýákiletti memlekettik organdar ol usynymdardy oryndaý jónindegi jumystardy atqarǵan joq dep sanaıdy.
