Senatta soltústik óńirlerge qonys aýdarýshylardyń máselesi kóterildi
NUR-SULTAN. QazAqparat - Senator Aıgúl Qapbarova kóshi-qon protsesterin iske asyrýdaǵy memlekettik sharalar men tetikterge qaramastan, óńirlerdegi kóshi-qon problemalary tolyq sheshilmeı otyrǵanyna alańdaýshylyq bildirdi. Bul týraly senator depýtattyq saýalynda jazdy, dep habarlaıdy QazAqparat.
«2018-2019 jyly jáne osy jyldyń 9 aıynda Soltústik Qazaqstan oblysyna ońtústik óńirden 5123 adam qonys aýdarǵan bolsa, óńirden 10 myńga jýyk adam kóship ketken. Osy oblysta sońǵy jyldary mektepter jabylyp, ǵımarattary aýktsıonǵa qoıylyp satylýda», - dedi Aıgúl Qapbarova Senattyń jalpy otyrysynda.
Sońǵy 5 jylda elden 189 765 adam qonys aýdarsa, 70 933 etnıkalyq qazaq kóship keldi. Aıyrmashylyq 118 832 adamdy quraıdy. Qazaqstannan shetelge turaqty turýǵa ketetinderdiń 43,8%-yn 15 pen 34 jasqa deıingi jastar quraıtyndyǵy alańdatady.
Senator syrtqy kóshi qonnyń sanyn azaıtý úshin ishki kóshi qon úderisindegi eńbek teńgerimin turaqty jáne tıimdi qalpyn saqtaý mańyzdy ekenin aıta kelip, el aýmaǵynyń birtutastyǵy úshin ońtústikten soltústik aımaqtarǵa baǵyttalǵan kóshi-qon úrdisin jalǵastyrý kerek dep sanaıdy.
«Qonys aýdarýshylar úshin memleket beretin turǵyn úılerdiń kópshiligi qazirgi zamanǵy ómir súrý standarttaryna, normalarǵa sáıkes kelmeıdi. Keıbir úıler qonys aýdarýshylardyń aıtýynsha, apatty jaǵdaıda tur. Qonys aýdarýshylardyń kásipkerlik qyzmetpen aınalysýǵa qoldaý kórsetýdiń keıbir tetikteri jetkiliksiz», - dedi senator A. Qapbarova.
Senator depýtattyq saýalda halyqty kóshirýdiń arnaıy memlekettik nemese óńirlik baǵdarlamasyn ázirleýdi usynyp otyr. Sebebi qazirgi tańda halyqty kóshirý protsesi «Eńbek» nátıjeli jumyspen qamtý baǵdarlamasynyń bir bóligi ǵana. Bul baǵdarlama qonystandyrý barysynda týyndaıtyn mindetter men máselelerdiń barlyq spektrin sheshpeıdi jáne qamtymaıdy.
«Óńiraralyq kóshi-qon protsesinde jas otbasylarǵa eleýli kóńil bólinip, memlekettik qoldaýdyń naqty tetikteri júzege asyrý kerek», - dedi depýtat.
Senator qonys aýdarýshylar úshin turǵyn úı berýdiń naqty tetigin pysyqtaýdy, bıýrokratııalyq kedergisiz jer ýchaskelerin berý, qonys aýdarýshylardy jınaqy qonystandyrý úshin jeke turǵyn úı salýǵa jeńildetilgen nesıe berý kerektigin atap ótti. Sondaı-aq «Bir tereze» qaǵıdaty boıynsha qonys aýdarýshylar týraly derekterdiń biryńǵaı avtomattandyrylǵan aqparat júıesin engizý qajettigi aıtyldy.
