Senatta shekara mańy turǵyndary úshin mańyzdy qujat talqylady

NUR-SULTAN. QazAqparat – Senatta «2006 jylǵy 3 qazandaǵy QR Úkimeti men RF Úkimeti arasyndaǵy Qazaqstannyń jáne Reseıdiń shekara mańyndaǵy aýmaqtary turǵyndarynyń Qazaqstan-Reseı memlekettik shekarasyn kesip ótý tártibi týraly kelisimge ózgerister engizý týraly hattamany ratıfıkatsııalaý týraly» zań jobasyn talqylandy, dep habarlaıdy QazAqparat tilshisi.

Hattama Reseı shekarasynyń mańynda turyp jatqan qazaqstandyq azamattardyń Qazaqstan-Reseı memlekettik shekarasyn kesip ótýi barysyn retteýge baǵyttalǵan jáne qujatty qabyldaý elimizdiń normatıvtik-qutyqtyq aktilerdegi ózgeristerge baılanysty.

Aıta keteıik, Qazaqstannyń ishki zańnamasynda azamattardy tirkeý kitabynyń kúshin joıýyna jáne mekenjaı anyqtamasynyń engizýine oraı atalǵan kelisimge tıisti ózgerister engizý qajettigi týyndady. Bul ózgerister 2018 jyly 9 qarashada Petropavlda 15-shi Óńiraralyq yntymaqtastyq forýmynda qol qoıylǵan hattamamen engizildi.

«Buryn ótkize beketterinde jeke kýálik nemese tólqujat jáne tirkeý kitabynan úzindi kóshirmeler talap etiletin bolatyn. Al qazirgi tańda jeke kýálik nemese tólqujat, sondaı-aq mekenjaı anyqtamasy engizildi. Hattamany qabyldaý memlekettik bıýdjetten qosymsha qarjy shyǵyndaryn talap etpeıdi», - dedi QR Syrtqy ister mınıstriniń orynbasary Marat Syzdyqov Parlament Senaty Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysynda.

Eki el arasyndaǵy shekara 7 500 shaqyrymnan asady jáne álemdegi eń uzyn shekara bolyp sanalady. Qazirgi ýaqytta Qazaqstan-Reseı shekarasynda 51 ótkizý beketi bar. Olardyń 30-y avtokólik, 20-sy temirjol jáne taǵy bireýi ózen arqyly iske asyrylady. Sonymen birge, shekara mańyndaǵy turǵyndarǵa arnalǵan 86 ótkizý beketteri jumys atqarýda.

Talqylaýdan keıin komıtet músheleri atalǵan zań jobasyn Senattyń jalpy otyrysynyń qaraýyna shyǵarý týraly sheshimdi qabyldady.