Senatta shaǵyn sharýashylyqtarǵa memlekettik qoldaýdy kúsheıtýdi máselesi kóterildi
Depýtattyń aıtýynsha, ótken jyly qalyptasqan jaǵdaı aýyl sharýashylyǵy salasynyń tehnologııalyq turǵydan artta qalýyn, tehnıkalyq jaraqtandyrýdyń tómen deńgeıin, sharýashylyq júrgizýdiń ekstensıvti ádisteriniń basymdylyǵyn kórsetti, sonyń nátıjesinde sala qazirgi zamanǵy syn-tegeýrinderge tótep bere almaıtyndyǵyn baıqatty.
Senator elimizde mal azyǵy zootehnıkalyq normalardan 2 ese az óndiriletinin, al qosalqy jáne usaq sharýa qojalyqtary memlekettik qoldaýdan aıyrylǵanyn atap ótti.
«Qazirgi tańda elimizdegi 1,6 myńnan astam qosalqy sharýashylyqtarda 3,5 mıllıonnan astam tabys deńgeıi tómen azamattar jumys isteıdi. Olar jylyna orta eseppen 2,5 trln teńgeniń aýyl sharýashylyǵy ónimderin óndirip, elimizdiń azyq-túlik qoryn tolyqtyrýda eleýli úlesterin qosyp keledi. Ókinishke qaraı, qosalqy sharýashylyqtar óndirgen ónimderdiń paıdasyn ortada júrgen deldaldar kórip keledi. Al usaq qojalyqtardy memlekettik qoldaý múldem joq dep aıtýǵa bolady», - dedi senator.
Osy máselelerdi sheshý úshin senator egis alqaptarynyń qurylymyn ártaraptandyrýmen jáne jemshóp, jarma, burshaq jáne maıly daqyldar alqaptaryn keńeıtýmen aınalysatyn sharýashylyqtardy belsendi qoldaýdy usyndy. Kooperatsııany, onyń ishinde qosalqy jáne usaq sharýashylyqtardy yntalandyrý da mańyzdy.
«Agrosektor sýbektilerine bólinetin nesıeler boıynsha paıyzdyq mólsherlemelerdi 2-3% - ǵa deıin tómendetý, qosalqy sharýashylyqtar úshin shaǵyn nesıe aýqymyn keńeıtý, sharýashylyq naýqany kezinde memlekettik qarajatty jyldam alý múmkindigin qarastyrý, naqty alynǵan ónimge nemese qaıta óńdeýge ótkizilgen kólemge baılanysty sýbsıdııalardy bólý boıynsha naqty sharalar kózdelýi tıis», - dep atap ótti senator Ábdáli Nuralıev.