Senatta shaǵyn qalalardaǵy jas mamandardy qoldaý máselesi kóterildi

NUR-SULTAN. QazAqparat - Senator Bekbolat Orynbekov aýdandyq mańyzy bar mono jáne shaǵyn qalalarǵa jumys isteý úshin kelgen jas mamandarǵa áleýmettik qoldaý kórsetý máselesin kóterdi. Ol bul týraly elimizdiń Úkimet basshysyna joldaǵan depýtattyq saýalynda aıtty, dep habarlaıdy QazAqparat tilshisi.

Búginde aýyldyq eldi mekenderge jumys isteýge jáne turýǵa kelgen áleýmettik sala mamandaryn qoldaýǵa baǵyttalǵan «Dıplommen aýylǵa» jobasy iske asyrylýda. Jobanyń basty maqsaty – aýyldyq eldi mekenderdegi kadr tapshylyǵyn sheshý.

Depýtattyń aıtýy boıynsha atalǵan baǵdarlamany aýdandyq mańyzy bar mono jáne shaǵyn qalalarda júzege asyrýda birqatar ózekti másele týyndap otyr.

«Atalǵan qalalarǵa jumys isteýge nemese turýǵa kelgen áleýmettik sala mamandaryna qoldaý kórsetý sharalary júrgizilmeýde. Qazirgi ýaqytta, Qazaqstan Respýblıkasy boıynsha 27 monoqalada 1,5 mln adam jáne 42 shaǵyn qalada 1 mln adam turady, onyń ishinde 69 aýdandyq mańyzy bar qalalarda 2,5 mln adam turady», - dedi Bekbolat Orynbekov Senattyń jalpy otyrysynda.

Mundaı jaǵdaı Jambyl oblysyndaǵy aýdan ortalyǵy bolyp esepteletin Jańatas, Qarataý, Shý qalalarynda oryn alyp otyr. Senator osy qalalarǵa jumysqa ornalasqan jas mamandar (dárigerler) «qala» statýsynyń bolýyna baılanysty barlyq áleýmettik kómekten shettetilýde. Bul jaǵdaı jergilikti jerde kadr tapshylyǵynyń odan ári ulǵaıýyna ákelip oytr.

«Shý qalasyna 2017-2018 jyldary kelgen 6 mamannyń 5-ýi bıýdjet esebinen beriletin áleýmettik kómekti almaýyna baılanysty jumystan ketken. 2019-2020 jyldary jas mamandar kelgen joq. Shý qalasy boıynsha kadr tapshylyǵy – 29 maman», - dedi Bekbolat Orynbekov.

Senator atalǵan máseleni sheshý úshin Ulttyq ekonomıka mınıstrliginiń buıryǵynda kórsetilgen talaptarǵa ózgerister men tolyqtyrýlar engizý qajet ekenin aıtty.