Senatta respýblıkalyq bıýdjettiń atqarylýy týraly esep tyńdalady

NUR-Sultan. QazAqparat - Senat tóraǵasy Máýlen Áshimbaev Bıýro otyrysyn ótkizdi. Onda Palatanyń 18 maýsymǵa josparlanǵan kezekti otyrysynda qaralatyn máseleler pysyqtaldy, dep habarlaıdy QazAqparat.

«Senatorlar aldaǵy otyrys barysynda QR Úkimeti men Respýblıkalyq bıýdjettiń atqarylýyn baqylaý jónindegi esep komıtetiniń 2019 jylǵy respýblıkalyq bıýdjettiń atqarylýy týraly esepterin tyńdaıdy jáne talqylaıtyn boldy. Sonymen qatar, otyrysta QR Ákimshilik rásimdik-protsestik kodeksiniń jobasy men ákimshilik rásimdik-protsestik zańnama máseleleri boıynsha ilespe zań jobasyn, Qazaqstan Respýblıkasy men Iran Islam Respýblıkasy arasyndaǵy azamattyq ister boıynsha ózara quqyqtyq kómek týraly kelisimniń ratıfıkatsııasyn jáne zańnamaǵa bıznes-ahýaldy jaqsartý máseleleri boıynsha engiziletin túzetýlerdi qaraý josparlanyp otyr», - delingen Senat baspasóz qyzmeti málimetinde.

Sonymen qatar, Bıýroda Májilisten kelip túsken zań jobalary komıtetter arasynda bólinip berildi.

Qarjy jáne bıýdjet komıteti «Salyq jáne bıýdjetke tólenetin basqa da mindetti tólemder týraly» QR Kodeksine (Salyq kodeksi) jáne «Salyq jáne bıýdjetke tólenetin basqa da mindetti tólemder týraly» QRKodeksin (Salyq kodeksi) qoldanysqa engizý týraly» Zańyna ózgerister men tolyqtyrýlar engizý týraly» jáne «Qazaqstan Respýblıkasynyń keıbir zańnamalyq aktilerine shetel valıýtasyndaǵy ıpotekalyq qaryzdar, kórsetiletin tólem qyzmetteri naryǵynyń sýbektilerin retteýdi jetildirý, jalpyǵa birdeı deklaratsııalaý jáne ekonomıkalyq ósýdi qalpyna keltirý máseleleri boıynsha ózgerister men tolyqtyrýlar engizý týraly» zań jobalary boıynsha bas komıtet bolyp belgilendi.

Budan bólek, «Qazaqstan Respýblıkasynyń keıbir zańnamalyq aktilerine aýyldyq eldi mekenderde Internettiń qoljetimdiligin qamtamasyz etý máseleleri boıynsha ózgerister men tolyqtyrýlar engizý týraly» zańynyń jobasyn pysyqtaý jumystarymen Ekonomıkalyq saıasat, ınnovatsııalyq damý jáne kásipkerlik komıteti aınalysatyn boldy.

«Qazaqstan Respýblıkasynyń keıbir zańnamalyq aktilerine erekshe qorǵalatyn tabıǵı aýmaqtar máseleleri boıynsha ózgerister men tolyqtyrýlar engizý týraly» zańnyń jobasy Agrarlyq máseleler, tabıǵatty paıdalaný jáne aýyldyq aýmaqtardy damytý komıtetine bólindi.

Bas komıtetterge QR Parlamenti Senatynyń basqa komıtetteriniń usynystaryn qorytý jáne osy qujattar boıynsha qorytyndylar daıyndaý tapsyryldy.