Senatta reseılik munaıdy Qazaqstan arqyly Qytaıǵa tasymaldaýǵa qatysty qujat qaralady
ASTANA. KAZINFORM - Senat Spıkeri Máýlen Áshimbaev Palata Bıýrosynyń otyrysyn ótkizdi. Onda depýtattar 2 mamyr kúni ótetin Senat otyrysynyń kún tártibin bekitti, dep habarlaıdy QR Parlamenti Senatynyń baspasóz qyzmeti.
Baspasóz qyzmetiniń málimetterine qaraǵanda, beısenbidegi otyrysta Qyzylorda oblysynan jańadan saılanǵan Parlament Senaty depýtatynyń ant berýi jáne ony turaqty komıtetke múshe etip saılaý máseleleri qaralady.
Sonymen qatar senatorlar «2013 jylǵy 24 jeltoqsandaǵy Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy Qazaqstan Respýblıkasynyń aýmaǵy arqyly Qytaı Halyq Respýblıkasyna reseılik munaıdy tasymaldaý salasyndaǵy yntymaqtastyq týraly kelisimge ózgerister engizý týraly hattamany ratıfıkatsııalaý týraly» zańdy qaraıdy.
Hattama tranzıt kólemderin, munaı tranzıti úshin tarıfter men tólemderdi jańartýdy, sondaı-aq Kelisimdi on jyldyq kezeńge 2034 jylǵy 1 qańtarǵa deıin uzartýdy kózdeıdi. Sondaı-aq qujatta kelisimdi júzege asyratyn quzyrly organdy anyqtaýǵa qatysty ózgerister engizilgen: Qazaqstan jaǵynan – bul Energetıka mınıstrligi, Reseı jaǵynan ýákiletti uıym – «Rosneft» munaı kompanııasy.
Sondaı-aq Palata otyrysynda «Qazaqstan Respýblıkasynyń keıbir zańnamalyq aktilerine baılanys, tsıfrlandyrý, ınvestıtsııalyq ahýaldy jaqsartý jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» zań qaralady. Bul zań kommýnıkatsııalyq ınfraqurylymdy damytýǵa, perspektıvaly telekommýnıkatsııalar men tsıfrlyq tehnologııalardy tartý úshin qolaıly zańnamalyq jaǵdaılar jasaýǵa jáne ınnovatsııalyq ekojúıeni odan ári jetildirýge baǵyttalǵan.
Odan bólek, Bıýro otyrysynda Májilisten kelip túsken zańdar jumys úshin turaqty Komıtetterge bólinip berildi.
