Senatta poshta salasyndaǵy halyqaralyq yntymaqtastyqqa qatysty zań jobasy qaraldy
NUR-SULTAN. QazAqparat – Parlament Senaty Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda «Dúnıejúzilik poshta odaǵynyń Jarǵysyna toǵyzynshy qosymsha hattamany ratıfıkatsııalaý týraly» zań jobasy qaraldy, dep habarlaıdy QazAqparat tilshisi.
Qazaqstan Respýblıkasy 1992 jyldan beri Dúnıejúzilik poshta odaǵynyń tolyq quqyqty múshesi bolyp sanalady. QR Úkimetiniń ótinishi negizinde Dúnıejúzilik poshta odaǵynyń Jarǵysyna qosyldy. Dúnıejúzilik poshta odaǵy álemniń 192 elin biriktiredi, 1874 jyly qurylǵan halyqaralyq úkimetaralyq uıym bolyp otyr, sondaı-aq Birikken Ulttar Uıymy mamandandyrylǵan mekemesi mártebesine ıe.
«Dúnıejúzilik poshta odaǵynyń basty maqsaty - ol búkil álemdegi adamdardyń qarym-qatynasyn jeńildetý úshin ámbebap, tıimdi, qoljetimdi poshta qyzmetteriniń sapasyn turaqty damytýǵa yqpal etý. Osy oraıda biryńǵaı poshta keńistigin qalyptastyrdy jáne jer sharynyń barlyq buryshtaryna poshta jóneltimderin óńdeý men jetkizý jónindegi jelini quraıdy. Dúnıejúzilik poshta odaǵy konsýltatsııalyq qyzmetterdi atqarady, tehnıkalyq kómek kórsetedi, halyqaralyq poshta almasýlaryna arnalǵan erejelerdi belgileıdi, poshta qyzmetteri kóleminiń ósýin yntalandyrý boıynsha usynystar beredi», - dedi QR Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Daryn Tuıaqov.
Dúnıejúzilik poshta odaǵynyń Jarǵysyna toǵyzynshy qosymsha hattama 2016 jylǵy 6 qazanda Ystanbul Dúnıejúzilik poshta odaǵynyń 26 Kongresinde jasaldy, sondaı-aq QR Úkimetiniń ýákiletti ókilderi qol qoıdy. Jarǵyǵa poshta qyzmetin usyný protsesine jáne poshta jóneltimin jetkizý merzimine áser etpeıtin redaktsııalyq sıpattaǵy ózgerister engiziledi.
Atalǵan komıtet músheleri zań jobasyna qoldaý bildirdi. Endi bul qujat Senattyń jalpy otyrysynda talqyǵa túsetin bolady.
