Senatta oryndaýshylardyń, fonogramma jasaýshylar men habar taratý uıymdarynyń quqyqtaryn qorǵaý týraly zań jobasy qaraldy
ASTANA. 17 qańtar. QazAqparat - Búgin Senattyń Áleýmettik-mádenı damý komıtetinde «Oryndaýshylardyń, fonogramma jasaýshylardyń jáne habar taratý uıymdarynyń quqyqtaryn qorǵaý týraly halyqaralyq konventsııany ratıfıkatsııalaý týraly» zań jobasy qaraldy.
Zań jobasy Qazastannyń Rım konventsııasyna qosylýyndaǵy mindetterin qarastyratyn, Keden odaǵynyń jáne Biryńǵaı ekonomıkalyq keńistikti qalyptastyrý aıasyndaǵy zııatkerlik menshikti saqtaý men qorǵaý salasyndaǵy retteýdiń biryńǵaı qaǵıdattary týraly 2010 jylǵy 9 jeltoqsanda qol qoıylǵan Kelisimge baılanysty ázirlendi.
1961 jylǵy 26 qazanda Rımde qabyldanǵan oryndaýshylardyń, fonogramma jasaýshylardyń jáne habar taratý uıymdarynyń quqyqtaryn qorǵaý týraly halyqaralyq konventsııa adamnyń mádenı quqyqtaryn, egemen memleketter arasyndaǵy zııatkerlik menshik máseleleri boıynsha qatynasty retteýge baǵyttalǵan.
Osy Konventsııaǵa qatysýshy barlyq elderdiń aýmaǵyndaǵy qaısybir qatysýshy memleketterdiń oryndaýshy ártisteri, fonogramma jasaýshylary, habar taratý uıymdarynyń qyzmetkerleri osy halyqaralyq quqyqtyq qujattyń qorǵaýyn paıdalanady.
Komıtettiń keńeıtilgen otyrysynda, sondaı-aq «Anany qorǵaý týraly 1952 jylǵy (qaıta qaralǵan) konventsııany qaıta qaraý týraly konventsııany ratıfıkatsııalaý týraly» zań jobasy da qaraldy.
Zań jobasynyń maqsaty 2000 jylǵy 15 maýsymda Halyqaralyq eńbek uıymynyń Bas konferentsııasy qabyldaǵan atalǵan Konventsııany ratıfıkatsııalaý bolyp tabylady. Konventsııa anany qorǵaýdy jáne ony kúzetýdi qamtamasyz etýge, áıelderdiń bala týýdaǵy rólin qorǵaýǵa qajetti sharalardy qabyldaýǵa baǵyttalǵan.
Qazaqstan Respýblıkasynyń osy Konventsııaǵa qatysýy ana men balany qorǵaý jáne saqtaý salasyndaǵy halyqaralyq yntymaqtastyqqa mańyz beredi jáne Qazaqstannyń osy saladaǵy halyqaralyq normalardy saqtap, oryndaýdy ustanatyndyǵyn rastaıdy.
Zań jobasy palatanyń qaraýyna jiberildi.
