Senatta órt sóndirýshilerdiń tehnıkalyq qamtamasyz etilýi máselesi kóterildi

NUR-SULTAN. QazAqparat - Senator Sergeı Ershov órt sóndirýshiler men qutqarýshylardy materıaldyq-tehnıkalyq jabdyqtaý qaǵıdattaryn, sondaı-aq olardyń áleýmettik qorǵalý deńgeıiniń tómendigin synǵa aldy. Ol elimizdiń Úkimet basshysy Álıhan Smaıylovtyń atyna depýtattyq saýalynda osy salanyń problemalaryn kóterdi.

Depýtat jaǵdaı órt sóndirýshilerdiń tehnıkalyq jabdyqtalýynda ǵana emes, depo úıleri men ǵımarattarynyń jaǵdaıy da óte kúrdeli ekenine nazar aýdardy.

Senatordyń aıtýynsha, búgingi tańda memlekettik órtke qarsy qyzmetiniń 419 bólimshesi bar, onyń 271-i, ıaǵnı jartysynan kóbi yńǵaılanǵan úı-jaılarda ornalasqan. 112 kúrdeli jóndeýdi qajet etedi, al apattyq jaǵdaıda bolýyna baılanysty 20-sy buzylýǵa jatady.

«Qalyptasqan jaǵdaıǵa taldaý jasaǵanda órt depolarynyń sandyq jáne sapalyq kórsetkishteri tótenshe jaǵdaıdy joıý kezinde halyqqa tıisti kómek kórsetý úshin jetkiliksiz dep aıtýǵa bolady. Birinshi kezekte qalalyq jáne aýyldyq jerlerde 124 órt sóndirý deposy keshenin salý talap etilip otyr. Órt sóndirý qyzmetteriniń qaramaǵynda fýnktsıonaldyq ártúrli maqsattaǵy 3 553 tehnıka bar. Bul rette olardyń 730-y 70-90-shy jyldardan bastap paıdalanylýda jáne tozyǵy jetýine baılanysty jańartýdy talap etedi», - dedi depýtat.

Senator tótenshe jaǵdaı organdary qyzmetkerlerin áleýmettik qorǵaýdyń máseleleri týraly óz áriptesteri de saýal joldaǵanyna nazar aýdardy. Úkimet jaýabynda bul másele pysyqtalyp jatqanyna sendirgen bolatyn, biraq áli nátıje joq. Depýtat osyǵan baılanysty máselelerdi sheshýdiń mańyzdylyǵyna muqııat qaraýdy surady.