Senatta orman jáne ańshylyq sharýashylyǵy salasyn damytýdy zańnamalyq turǵyda qamtamasyz etý máseleleri talqylandy
ASTANA. 5 qazan. QazAqparat - Búgin Parlament Senaty Tabıǵatty paıdalaný jáne aýyldyq aýmaqtardy damytý komıteti depýtattarynyń Aýyl sharýashylyǵy mınıstrligi Orman jáne ańshylyq sharýashylyǵy komıteti basshylyǵymen kezdesýi
barysynda orman jáne ańshylyq sharýashylyǵy salasyn damytýdy zańnamalyq turǵyda qamtamasyz etý máseleleri talqylandy.
Senat komıtetiniń tóraǵasy Bolat Jylqyshıev kezdesýge qatysýshylardyń nazaryn osy salany retteıtin zańnamaǵa aýdardy.
Depýtat atap ótkendeı, qazirgi kezde ósimdikter álemin qorǵaý jáne paıdalanýdy retteý máseleleri memlekettik orman qorynyń jeri men elimizdegi erekshe qorǵalatyn tabıǵı aýmaqtary úshin ázirlengen bolatyn.
B.Jylqyshıevtiń aıtýynsha, ormannan tys ósimdikter álemin qorǵaý jáne paıdalaný máseleleri ekologııalyq, jer, sý, erekshe qorǵalatyn tabıǵı aýmaqtar, temirjol kóligi men avtokólik joldary, sharýa (fermer) qojalyqtary týraly zańnamamen retteledi.
Basqosýda Senat depýtattary Q.Aıtahanov, E.Nyǵmatýllın, S.Eskendirov jáne basqa da kezdesýge qatysýshylar óz pikirlerin ortaǵa saldy.
Aýyl sharýashylyǵy mınıstrligi Orman jáne ańshylyq sharýashylyǵy komıtetiniń tóraǵasy E.Nysanbaev Іle Alataýy memlekettik ulttyq tabıǵı parki aýmaǵyndaǵy tótenshe jaǵdaıdyń zardaptaryn joıý jáne ózderiniń jeńil motorly avıatsııa parki úshin qosymsha qarjy bólýge qatysty máselelerge toqtaldy.
Kezdesýler aıasynda depýtattar Astananyń jasyl beldeýi aýmaǵyn aralap kórdi.
Jelden qorǵaý jáne qolaıly tabıǵı ahýal qalyptastyrý maqsatynda elorda tóńireginde jasyl beldeý jasaý týraly Memleket basshysynyń tapsyrmasy boıynsha 1997 jyldan beri jumystar júrgizilip keledi.
