Senatta organıkalyq ónim óndirisi men aınalymy týraly zańdar talqylandy
ASTANA. KAZINFORM - Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń depýtattary keńeıtilgen otyrysta otandyq organıkalyq ónim naryǵyn damytýǵa baǵyttalǵan zańdardy talqylady.
Bul týraly QR Parlamenti Senatynyń baspasóz qyzmetinen málim boldy.
«Organıkalyq ónim óndirisi jáne onyń aınalymy týraly» jáne oǵan ilespe «Qazaqstan Respýblıkasynyń keıbir zańnamalyq aktilerine organıkalyq ónim óndirisi jáne onyń aınalymy máseleleri boıynsha ózgerister men tolyqtyrýlar engizý týraly» zańdar organıkalyq ónim salasyndaǵy zańnamany jaqsartýǵa, ishki naryqty damytý úshin óndirýshilerdi osyndaı taýar jasaýǵa yntalandyrýǵa jáne shetelde básekege qabilettilikti nyǵaıtýǵa baǵyttalǵan. Zańdarda organıkalyq óndiriske kóshý sharttary belgilengen, ónim óndirýge, tańbalaýǵa jáne aınalymǵa qoıylatyn talaptar aıqyndalǵan, sondaı-aq esepke alý jáne baqylaý júıesi jasalǵan.
Depýtattar «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zańdy da qarady. Jergilikti atqarýshy organdardaǵy tıisti baqylaý fýnktsııasynyń alynyp qalýyna baılanysty organıkalyq ónim óndirý salasyndaǵy zańnamany buzýdaǵy jaýapkershilik zańmen alyp tastalady. Sáıkestikti rastaý jónindegi organdar azamattyq-quqyqtyq qatynastar aıasynda organıkalyq ónim óndirýshilerge tekserý júrgizedi. Organıkalyq ónimdi satý satysynda memlekettik baqylaýdy jáne qadaǵalaýdy halyqtyń sanıtarlyq-epıdemıologııalyq ál-aýqaty salasyndaǵy ýákiletti organ júzege asyrady.
Senatorlardyń aıtýynsha, zańdardyń qabyldanýy elimizdegi azyq-túlik qaýipsizdigin qamtamasyz etýge, sapaly jáne ekologııalyq taza ónimdi tutynýǵa oń áser etedi.
Komıtet músheleri talqylaý qorytyndysy boıynsha zańdardy Palata otyrysynda qaraýǵa jiberý týraly sheshim qabyldady.
