Senatta Ómirbek Baıgeldiulynyń 70 jasqa tolý mereıtoıyna arnalǵan saltanatty rásim ótti
ASTANA. Qazannyń 24-i. QazAqparat - Búgin Senatta Qasym-Jomart Toqaevtyń tóraǵalyq etýimen Qazaqstan Respýblıkasy Parlamenti Senatynyń tuńǵysh Tóraǵasy Ómirbek Baıgeldiulynyń 70 jasqa tolý mereıtoıyna arnalǵan saltanatty rásim ótti,
dep habarlaıdy QazAqparat QR Parlamenti Senatynyń baspasóz qyzmetine silteme jasap.
Sharany asha kelip, Q.Toqaev Ó.Baıgeldıdiń memlekettigimizdiń ornyǵýy men damý jolyna, táýelsiz Qazaqstannyń órkendeýine jáne qazaqstandyq parlamentarızmniń qalyptasýyna qosqan aıtýly úlesterin atap ótti.
«Ómirbek Baıgeldiuly Parlament Senatynyń tuńǵysh Tóraǵasy retinde, bul asa jaýapty ári mártebeli laýazymdy bıik deńgeıde, abyroımen atqardy. Jas memleketimizdiń zańnamalyq qyzmetin jetildirýge zor úles qosyp, árdaıym eldik, memlekettik, jalpyulttyq ózekti máselelerdi batyl kóterýimen kópshiliktiń iltıpatyna bólendi», dedi Tóraǵa.
Ol sonymen qatar, Ó.Baıgeldiulynyń ulttyq óner men ádebıetti nasıhattaýǵa jáne tarıhı muralarymyzdy saqtaýǵa qosqan eleýli úlesterine toqtaldy.
Saltanatty sharada sóz alǵan Halyqaralyq qatynastar, qorǵanys jáne qaýipsizdik komıtetiniń tóraǵasy Qýanysh Sultanov Ó.Baıgeldiulynyń úlken eńbek jolyn atap ótti.
«Ol óziniń eńbek jolyn aýyldaǵy sol kezdegi ujymshardyń múshesi bolyp bastap, el Parlamenti Senatynyń tuńǵysh Tóraǵasy bolyp saılandy», dedi Q.Sultanov.
Ó.Baıgeldiuly táýelsiz memleketimizdiń egemen el retinde qalyptasýyna belsendi atsalysqan, kóptegen eńbekterdiń avtory, ekonomıka ǵylymdarynyń doktory, Aýyl sharýashylyǵy ǵylymdary akademııasynyń akademıgi.
Senator kóp jylǵy eren eńbegi úshin Eńbek Qyzyl Tý, Halyqtar Dostyǵy, Qurmet, Otan jáne TMD halyqtar dostyǵy ordenderimen marapattalǵan.
