Senatta notarıat salasynyń ózekti máseleleri talqylandy
ASTANA. 8 aqpan. QazAqparat - Búgin Parlament Senatynda «Qazaqstan Respýblıkasynyń notarıat týraly zańnamasy: qazirgi jaı-kúıi, problemalary jáne keleshekte jetildirý baǵyttary» taqyryby boıynsha dóńgelek ústel otyrysy bolyp ótti.
Toqtala ketetin jaıt, elimizde «Notarıat týraly» zań osydan 16 jyl buryn qabyldanǵan bolatyn. Sodan beri jyl saıyn notarıat ınstıtýtyn jetildirýge baǵyttalǵan túzetýler engizilip keledi. Osyǵan oraı, jıyndy ashyp sóz sóılegen Senat tóraǵasynyń orynbasary Qaırat Işanov notarıat qyzmeti salasyndaǵy kóterilgen máselelerdi zertteýdiń mańyzdylyǵy men kemshilikterin joıýdyń ózektiligin atap ótti.
«Naryqtyq qatynastardyń jedel damýy jyldam jáne sapaly quqyqtyq kómek sekildi jeke notarıat ınstıtýtynyń engizilýi de ýaqyttyń talaby boldy. Deı turǵanmen, notarıat júıesindegi qazir oryn alyp otyrǵan kúrdeli máselelerdi odan ári zerdeleý jáne olqylyqtardy joıý mańyzdy bolyp otyr», - dedi Q.Işanov.
Al óz kezeginde senator Serik Aqylbaı búgingi tańda notarıat qyzmeti men óndirisi salasynda aıqyndalǵan problemalyq máselelerdiń bar ekenine toqtaldy. «Notarıattyq is-qımyldy iske asyrý aıasynda notarıýstyń jańa mindeti - medıator bolýdy engizý qajet dep bilemin. Jeke notarıýsterdiń ortalyqtandyrylǵan muraǵattaryn jınaý jáne saqtaý, sondaı-aq notarıýs kómekshisiniń róli men mártebesin kóterý sekildi notarıattyń ózekti máseleleri de zań júzinde jetildirýdi qajet etedi», - dedi senator.
«Dóńgelek ústel» barysynda Ádilet mınıstri Berik Imashev sóz sóılep, Májilistiń Zańnama jáne sot-quqyq reformalary jónindegi komıtetiniń tóraǵasy Rahmet Muqashev notarıattyq zańnama týraly aıtty. Joǵarǵy Sottyń Azamattyq jáne ákimshilik ister jónindegi sot qadaǵalaý alqasynyń sýdıasy Jańylsyn Arharova notarıat qyzmetin jetildirý joldary týraly áńgimelese, Respýblıkalyq notarıaldyq palatanyń tóraǵasy Ásel Janábilova notarıat ınstıtýtyn jetildirýdiń keleshegi jaıynda baıandady.
