Senatta múgedektigi bar adamdardyń tótenshe jaǵdaı kezindegi problemalary sóz boldy
ASTANA. KAZINFORM – Senatta ótken Inklıýzııa jónindegi keńestiń otyrysy tótenshe jaǵdaılarda múgedekterdi qorǵaý jáne qaýipsizdik máselelerine arnaldy.
Keńes músheleri osy sanattaǵy azamattardyń qaýipsizdigin qamtamasyz etýdiń ózekti máselelerin sarapshylarmen jáne Tótenshe jaǵdaılar mınıstrliginiń ókilderimen birge talqylady.
Atap aıtqanda, sý tasqyny kezeńinde múgedektigi bar adamdardy ýaqytsha ornalastyrý pýnktteriniń qoljetimsizdigi týraly sóz boldy. Kóptegen evakýatsııalyq pýnktter halyqtyń qozǵalysy az toptaryna laıyq jasalmaǵan. Bıik tabaldyryq, taıǵaq eden, tar esik, joǵary kóteriletin pandýstyń, taný jáne seziný belgileriniń bolmaýy múgedekter men qart azamattarǵa, júkti áıelder men arbaly ata-analarǵa qosymsha qıyndyqtar týǵyzady.
Senatorlar múgedektigi bar adamdar men olarǵa ilesip júrýshilerdi tótenshe jaǵdaıda áreket etýdiń negizgi qaǵıdalaryna arnaıy oqytýmen qosa halyqtyń tótenshe jaǵdaıǵa daıyndyq deńgeıin arttyrýdyń mańyzdylyǵyn atap ótti. Sondaı-aq múgedektigi bar adamdardyń qajettilikterin eskere otyryp, erte habarlaý júıesin jetildirý, ýaqytsha ornalastyrý pýnktteriniń qoljetimdiligi men aqparattyq materıaldardy taratýdy qamtamasyz etý usynyldy.
«Tótenshe jaǵdaılarda múgedektigi bar adamdardyń qaýipsizdigin qamtamasyz etý – bul jaı ǵana qorǵaý máselesi emes, olardyń negizgi quqyqtaryn saqtaý ekeni anyq. Qaýipsizdik sharalaryn ázirleý kezinde biz múgedektiktiń ártúrli sıpatyn eskerýimiz kerek, osylaısha árbir adam, olardyń qozǵalý múmkindigine qaramastan, ýaqtyly kómek ala alady. Ol evakýatsııaǵa ǵana emes, aqparat pen oqytýdyń jáne ınfraqurylymnyń qoljetimdiligine de qatysty. Biz kúsh-jigerdi biriktire otyryp, múgedektigi bar adamdar tótenshe jaǵdaı kezinde qıyn jaǵdaıǵa tap bolmaıtyndaı júıe qurýymyz kerek», - dep atap ótti Senat janyndaǵy Inklıýzııa jónindegi keńestiń tóraǵasy Lázzat Qaltaeva.
Tótenshe jaǵdaılar mınıstrliginiń ókilderi óz kezeginde búgingi tańda qaýip dárejesi joǵary 459 áleýmettik sala nysany mekeme esebinde turǵanyn atap ótti. Memlekettik órt baqylaý qyzmeti zań talaby buzylýynyń aldyn alý úshin áleýmettik ınfraqurylym obektilerin únemi tekserip otyrady. Jedel áreket etý jáne evakýatsııa máselesi de talqylaýdyń mańyzdy taqyryby boldy. Tótenshe jaǵdaılar júıesinde múgedektigi bar 263 026 azamat týraly derek bar. Bul qutqarý qyzmetteriniń tıimdi áreket etýine kómektesedi.
Senatorlar barlyq múddeli taraptarǵa áleýmettik ınfraqurylym obektileri men ýaqytsha ornalastyrý pýnktteriniń qoljetimdiligi boıynsha júıeli monıtorıng júrgizýdi, sondaı-aq vırtýaldy keńes berý men assıstıvtik tehnologııany sınhrondaý úshin «Darmen» qosymshasynyń qyzmetin pysyqtaý múmkindigin qarastyrýdy usyndy.
Keńes otyrysyna qatysýshylar memlekettik organdardyń, qoǵamdyq uıymdardyń jáne saraptamalyq qoǵamdastyqtyń ózara tyǵyz is-qımyly arqasynda múgedektigi bar adamdardyń tótenshe jaǵdaı kezindegi qaýipsizdigin jaqsartý jumystary jalǵasa berýi tıis ekenin atap ótti.
Aıta keteıik, SQO-da múgedektigi bar balalarǵa arnalǵan ońaltý ortalyǵy ashylady.