Senatta máslıhat hatshylarynyń jalaqysy máselesi kóterildi
«Bizdiń depýtattyq saýalymyz kópten beri aıtylyp, biraq osy kezge deıin sheshimin tappaı kele jatqan elimizdegi aýdandyq, qalalyq jáne oblystyq máslıhat hatshylary men tekserý komıssııasynyń mártebesine qatysty bolmaq. Bizder taıaýda óńirlerde issaparda bolǵanymyzda jergilikti máslıhattardyń mártebesin kóterý boıynsha jumystarda áli de sheshimin tappaǵan máselelerdiń bar ekeninine kýá boldyq. Atap aıtqanda, Úkimettiń 2021 jylǵy maýsymdaǵy qaýlysyna oraı, jergilikti deńgeıde qyzmet atqaratyn memlekettik qyzmetshilerdiń jalaqysy 2 eseden artyq kóterilgen, alaıda barlyq deńgeıdegi máslıhat hatshylarynyń eńbek aqysy sol burynǵy qalpynda qalyp qoıdy.
Osy oraıda aıta ketý kerek, mundaı jaǵdaı 2016 jyly memlekettik qyzmetshilerdiń jalaqysy kóterilgende de oryn alǵan edi.
Sonymen qatar, «Sybaılas jemqorlyqqa qarsy is-qımyl týraly» Zańyna sáıkes, máslıhat hatshylary memlekettik bıýdjet esebinen qamtylǵan barlyq organdar úshin qyzmetkerlerdiń eńbegine aqy tóleýdiń biryńǵaı júıesine sáıkes jalaqy alyp, máslıhat apparatynyń memlekettik qyzmetine tolyq jaýapty bolǵanymen, memlekettik qyzmetshi bolyp tabylmaı, memlekettik fýnktsııalardy oryndaýǵa ýákilettik berilgen tulǵa retinde qaralady», - dedi Murat Baqtııaruly Úkimet basshysy Asqar Mamınniń atyna joldaǵan saýalynda.
Onyń aıtýynsha, máslıhat hatshylary memlekettik saıası jáne memlekettik ákimshilik laýazymdyq deńgeıler men fýnktsıonaldyq bloktar boıynsha bóliniske engizilmegen. Sondyqtan memlekettik saıası jáne ákimshilik qyzmetshilerdiń laýazymdyq aılyq aqylarynyń shemasyna da enbegendikten jalaqysy kóterilmeı qaldy. Mysaly aýdandyq deńgeıdegi máslıhat hatshysy aýdandyq máslıhat apparat basshysynan eki ese, bólim basshysynan 50% tómen jalaqy alady. Al oblystyq máslıhat hatshysy oblystyq máslıhat apparat basshysynan 50% tómen jalaqy alady. Máslıhat hatshylarynyń máslıhat apparat qyzmetkerlerinen tómen jalaqy alýy, laýazymdyq ıerarhııa qaǵıdalarynyń saqtalmaýyna ákelip soǵýda.
«Dál osyndaı jaǵdaı tekserý komıssııasy tóraǵalary men tekserý komıssııasy músheleriniń jalaqysyna da qatysty oryn alyp otyr. Tekserý komıssııasy tóraǵalarynyń jalaqysy tek 33%-ǵa, tekserý komıssııa músheleriniń jalaqysy17%-ǵa ǵana kóbeıdi, al basqa memlekettik qyzmetshilerdiń jalaqysy eki nemese odan da kóp esege ósti. Bul rette tekserý komıssııa músheleri óz ókilettikterine sáıkes, jergilikti atqarýshy organdar qyzmeti tıimdiliginiń táýelsiz qorytyndysyn ázirleıtinin atap ótken jón. Osyǵan oraı, barlyq deńgeıdegi máslıhat hatshylary men tekserý komıssııasynyń mártebesin Qazaqstan Respýblıkasynyń zańnamalarymen retteý týraly máseleni qarastyrýyńyzdy suraımyz», - dedi senator Premer-Mınıstrge joldaǵan saýalynda.
