Senatta qysqy sport túrlerin damytý máselesi kóterildi

ASTANA. QazAqparat - Senator Amangeldi Tolamısov Úkimet basshysy Álıhan Smaıylovtyń atyna joldaǵan depýtattyq saýalynda Jetisý oblysynda qysqy sport túrlerin damytý máseleleri týraly aıtty, dep habarlaıdy QazAqparat tilshisi.

Parlament depýtaty Almaty oblysyndaǵy qysqy sport túrleri boıynsha sport ortalyqtary ári balalar men jasóspirimderge arnalǵan sport mektepteriniń materıaldyq-tehnıkalyq bazasynyń jáne damý deńgeıiniń tómendigine alańdaýshylyq bildirdi.

«Óńirlerde qysqy sport túrlerine arnalǵan jabyq sporttyq keshender az. Olardyń kóbi tek Astana men Almaty qalalarynda ornalasqan. Sondyqtan bul máseleni tez arada qolǵa alyp, barlyq óńirde, sonyń ishinde Jetisý oblysynda qysqy sport túrlerinen jabyq sporttyq keshenderdi barynsha kóbeıtý kerek dep oılaımyz», - dedi depýtat Senattyń jalpy otyrysynda.

Senator óńirde tıisti sport ǵımarattaryn salýdy, daryndy sportshy balalarǵa arnalǵan Lepsi aýylyndaǵy mektep-ınternatynyń materıaldyq-tehnıkalyq bazasyn jańǵyrtýdy, sondaı-aq Taldyqorǵan jáne Tekeli qalalarynda, Aqsý aýdanynyń Qapal aýylynda qysqy sport túrleri boıynsha arnaýly jáne balalar men jasóspirimderge arnalǵan sport mektepterin ashýdy usyndy. Sonymen qatar senator oblystaǵy Eskeldi aýdanynda BJSM janynan shańǵy bólimin ashýdyń jáne oblys ortalyǵynda muz saraıyn salýdyń mańyzdylyǵyna nazar aýdardy.