Senatta Qazaqstan men Qyrǵyzstannyń kóshi-qon salasyndaǵy yntymaqtastyǵy talqylandy
NUR-SULTAN. QazAqparat - Senatorlar «Qazaqstan Respýblıkasynyń Úkimeti men Qyrǵyz Respýblıkasynyń Úkimeti arasyndaǵy kóshi-qon salasyndaǵy yntymaqtastyq týraly kelisimdi ratıfıkatsııalaý týraly» zań jobasyn talqylady.
Osy Kelisim aıasynda taraptar kóshi-qon salasyndaǵy ekijaqty yntymaqtastyqty kúsheıtýdi josparlap otyr, dep habarlaıdy QazAqparat QR Parlamenti Senatynyń baspasóz qyzmetine silteme jasap.
Koronavırýs kezeńinde kóptegen kóship-qonýshylar Qazaqstan aýmaǵynan shyǵa almady. Sondyqtan olardyń Qazaqstanda bolý merzimin uzartý týraly Úkimettiń qaýlysy qabyldanǵan bolatyn. Jyl basynda kóshi-qon qyzmeti Halyqaralyq kóshi-qon uıymymen birlese otyryp jumys júrgizdi jáne sonyń nátıjesinde 133 myń mıgrant otanyna oraldy.
Komıtet tóraǵasy Vladımır Volkov koronavırýs pandemııasy kezinde kóshi-qon zańnamasyn buzǵan 3 myńnan astam sheteldik azamat ákimshilik jaýapqa tartylǵany týraly keńeıtilgen otyrysqa qatysýshylardy habardar etti. Sondaı-aq, Qazaqstan arqyly zańsyz tranzıt arnasyn uıymdastyrǵandar úshin 27 qylmystyq is qozǵaldy.
Senat depýtaty Nurlan Beknazarov zań jobasynyń negizgi mindeti kóshi-qon protsesteri men azamattyq máselelerine qatysty málimetter almasýǵa qolaıly jaǵdaı jasaý, sondaı-aq zańsyz kóshi-qon arnalaryn anyqtaý ekenin atap ótti.
«Qujat kóshi-qon jáne azamattardyń quqyqtaryn qorǵaý salasynda ózara is-qımyldy júzege asyrady. Zań jobasyn qabyldaý zańsyz kóshi - qonǵa qarsy kúreste jáne kóshi-qon protsesterin retteýde eki el yntymaqtastyǵynyń tıimdiligin arttyrý boıynsha quqyqtyq negiz jasaýǵa múmkindik beredi», - dedi senator.
Kelisimge qatysýshy elder qajet bolǵan jaǵdaıda basqa eldiń aýmaǵynda bolǵan eki eldiń azamattaryn turǵylyqty jeri boıynsha tirkeý jónindegi málimetterdi ala alady dep kútilip otyr.
Konstıtýtsııalyq zańnama, sot júıesi jáne quqyq qorǵaý organdary komıteti zań jobasyn Palatanyń qaraýyna engizdi.
