Senatta Qazaqstan men Katar arasyndaǵy strategııalyq áriptestik týraly kelisim qaraldy

ASTANA. KAZINFORM — Senat Spıkeri Máýlen Áshimbaevtyń tóraǵalyǵymen Palata Bıýrosynyń otyrysy ótti. Onda depýtattar 10 qazan kúni ótetin Palata otyrysynyń kún tártibin bekitti jáne Senattyń Іs-sharalar josparyn iske asyrý aıasyndaǵy mindetterdi talqylady. Bul týraly Senattyń baspasóz qyzmeti málim etti.

Senat Tóraǵasy óz sózinde elimizde ótken AES salý máselesine qatysty respýblıkalyq referendýmnyń qorytyndysyna toqtalyp ótti.

Máýlen Áshimbaev referendýmǵa qazaqstandyqtardyń belsendi qatysqanyn tilge tıek etip, bul azamattardyń Memleket basshysynyń Ádiletti Qazaqstan qalyptastyrý jolyndaǵy barlyq bastamasyn qoldaıtynyn taǵy da bir kórsetip bergenin aıtty. Sondaı-aq ol el Prezıdentiniń referendým ótkizý týraly sheshimi memlekettiń bolashaǵy úshin asa mańyzdy qadam ekenine nazar aýdardy.

Sonymen qatar Bıýro otyrysynda 8-9 qazan kúnderi Astanada ótetin Álemdik jáne dástúrli dinder lıderleri Sezi Hatshylyǵynyń XXII otyrysy men І Jas dinı lıderlerdiń forýmyna daıyndyq barysy pysyqtaldy. Atalǵan is-sharalarǵa 19 elden kelgen 30 delegatsııa ókilderi qatysady.

Bıýro músheleri osy aptada ótetin Palata otyrysynyń da kún tártibin talqylady. Ótken aptada Memleket basshysynyń Jarlyǵymen Marat Qojaev Senat depýtaty bolyp taǵaıyndalǵan edi. Osyǵan baılanysty jalpy otyrysta ant berý, turaqty komıtetke múshe etip saılaý sııaqty uıymdastyrý máseleleri qaralady.

Budan basqa, Senat otyrysynyń kún tártibine «Qazaqstan Respýblıkasynyń Úkimeti men Qatar Memleketiniń Úkimeti arasyndaǵy basym salalardaǵy jobalardy damytý úshin uzaqmerzimdi strategııalyq áriptestik ornatý týraly kelisimdi ratıfıkatsııalaý týraly» zań shyǵaryldy.

Atalǵan zań normalary eki eldiń telekommýnıkatsııa, energetıka, munaı-hımııa jáne basqa da salalardaǵy birlesken jobalaryn iske asyrýǵa, sondaı-aq, saýda-ekonomıkalyq yntymaqtastyqty nyǵaıtýǵa arnalǵan.

Sondaı-aq Bıýro otyrysynda Májilisten kelip túsken zańdar jumys úshin turaqty Komıtetterge bólinip berildi.