Senatta qaýipti óndiris salasyndaǵy jumysshylardy áleýmettik qorǵaý týraly qujat qabyldandy

NUR-SULTAN. QazAqparat – Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine personal berý jónindegi qyzmetterdi kórsetý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, qabyldandy. Atalǵan zańǵa Parlament depýtattary bastamashy boldy, dep habarlaıdy QazAqparat tilshisi.

Zań jobasynyń maqsaty - personal berý jónindegi qyzmetterdi kórsetý salasyn quqyqtyq retteýdi qamtamasyz etý, osyndaı qyzmetter kórsetýge shart jasasý tártibin aıqyndaý, taraptardyń eńbek qaýipsizdigi jáne eńbekti qorǵaý salasyndaǵy quqyqtary men mindetterin belgileý. Qazaqstan Respýblıkasy zańnamasyndaǵy qaryzdyq eńbek sııaqty eńbek túrin quqyqtyq retteý qajettiligi negizdelgen jáne ýaqytyly bolyp otyr.

«Zań jobasy tolyqtaı maqsattar men mindetterge sáıkes keledi. Zań jobasyn qabyldaýdan kútiletin nátıje jumyspen qamtýdyń osy nysany boıynsha negizgi uǵymdardy zańnamalyq deńgeıde bekitý, osy sanattaǵy jumyskerlerge eńbekaqy tóleý jáne syılyqaqy berý júıesin naqtylaý, óndiristegi jazataıym oqıǵalardy tergep-tekserý tetigin retke keltirý, qyzmetkerlerdi, onyń ishinde zııandy jáne qaýipti eńbek jaǵdaılary bar óndiristerde jumys isteıtinderdi áleýmettik qorǵaý máselelerin sheshý, taraptardyń quqyqtaryn, mindetterin jáne jaýapkershiligin belgileýge negizdelgen», - dedi senator Aqmaral Álnazarova.

Onyń paıymynsha, zań jobasynyń qabyldanýy – jumyskerler men jumysqa alýshylardyń qyzmetteriniń tıimdiligin arttyrýǵa yqpal etetin qolaıly jaǵdaılar jasaıdy.