Senatta qasaqana qylmystar úshin jaýaptylyqty kúsheıtý máselesi qaraldy

NUR-SULTAN. QazAqparat – Parlament Senaty Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysynda qylmystyq jáne qylmystyq-protsestik zańnamany jetildirý máseleleri boıynsha zań jobasy talqylandy, dep habarlaıdy QazAqparat tilshisi.

«Zań jobasynyń birinshi blogy Memleket basshysy Qasym-Jomart Toqaevtyń tapsyrmasyn qamtıdy. Olar jekelegen qasaqana qylmystar úshin jaýaptylyqty qataıtý týraly. Atap aıtsaq, urlyq, zorlaý, esirtki taratý, brakonerlik, mas kúıinde kólik júrgizýge baılanysty bolyp otyr», - dedi QR Bas prokýrorynyń orynbasary Marat Ahmetjanov.

Sonymen qatar Bas prokýrordyń orynbasary zań jobasynda mal urlyǵyna qatysty jańa bap engizilgenin atap ótti. Jalpy, urlyq, tonaý jáne qaraqshylyq maqsatynda úı-jaıǵa, qoımaǵa, kólik quralyna zańsyz buzyp kirýmen jasalǵan qylmystar úshin jaýaptylyq kúsheımek. Urlyqqa qatysty áreketter aýyr qylmystar sanatyna kóshedi.

«Zańsyz esirtki aınalymy úshin zańnama talaptary kúsheıtiledi. Elektrondyq aqparat resýrstary arqyly esirtki taratý, esirtkini nasıhattaý men jarnama úshin qylmysqa jaýapkershilik artady», - dedi M. Ahmetjanov.

Budan bólek ol zańsyz ańshylyq pen zańsyz balyq aýlaýǵa tosqaýyl qoıý máselesine erekshe ekpin jasalyp otyrǵandyǵyn atap ótti. Sonymen qatar, kıik janýaryna qatysty jaýaptylyq kúsheıtilmek. Tabıǵatymyzdy, ań qustarymyzdy qorǵaıtyn ınspektordy jáne qoryqshynyń ómirine qaýip tóndirip, kúsh qoldanǵany úshin jaýapkershilik engizý qarastyrylǵan.

Eske sala keteıik, qarasha aıynda atalǵan zań jobasyn talqylaý barysynda Marat Ahmetjanov mal urlyǵyna qatysty qylmys túrimen kúresti kúsheıtip, jaýaptylyqty qatańdatý kerektigin aıtqan bolatyn.