Senatta ınvestorlarǵa salyqtyq jeńildikter berý týraly túzetýler qabyldandy

NUR-SULTAN. QazAqparat - Senatorlar ınvestorlarǵa arnalǵan salyqtyq jeńildikter týraly túzetýlerdi qabyldady. Depýtattar ekonomıkanyń basym salalaryna ınvestıtsııa salýǵa ári damytýǵa daıyn ınvestorlarǵa arnalǵan «nóldik mólsherlemeni» engizýdi usyndy, dep habarlaıdy QazAqparat tilshisi.

«Investıtsııalardyń kólemine, merzimine jáne jumys ornyna baılanysty ınvestorlar korporatıvtik tabys salyǵynan, jer salyǵynan, qosymsha qun salyǵynan jáne múlik salyǵynan 10 jylǵa deıingi merzimge bosatylady. Bul qadam el ekonomıkasyna ınvestorlar tartý jáne osyndaı kúrdeli kezeńde jańa jobalardy iske asyrý úshin qajet. Senatorlar bul ózgeristerdi el Prezıdentiniń tapsyrmasy aıasynda usynyp otyr», - dedi Máýlen Áshimbaev.

Senat depýtattarynyń pikirinshe, mundaı erekshe jaǵdaı otandyq ekonomıka úshin kúrdeli kezeńde naryqta suranysqa ıe taýar túrlerin, sonyń ishinde eksportqa shyǵarýǵa qabiletti jańa óndiristerdi bastaýǵa múmkindik beredi. Salyq boıynsha «nóldik mólsherleme» Úkimet pen ınvestorlar arasynda jasalatyn barlyq ýaǵdalastyqtardy bekitý úshin strategııalyq ınvestıtsııalyq kelisim sheńberinde jańa qural retinde áreket ete bastaıdy.

«Qazirgi jaǵdaıda álemde ınvestıtsııalar úshin básekelestik baıqalyp otyr. Ol ekonomıkanyń barlyq salalarynda jańa ınvestıtsııalyq jobalardy iske asyrý, sondaı-aq ınvestıtsııalyq ahýaldy odan ári jaqsartý boıynsha belsendi sharalar qabyldaýdy talap etedi. Sheteldik kapıtaldy tartýdyń jańa quraldaryn engizý qajet», - dedi senator Saǵyndyq Luqpanov.

Kelisimniń qoldanylýy merziminen buryn toqtatylǵan jaǵdaıda salyqtar boıynsha preferentsııalar jáne Qazaqstan Respýblıkasy salyq zańnamasynyń turaqtylyǵyna kepildik ol jasalǵan kúnnen bastap kúshin joıady. Sondaı-aq, ınvestıtsııalyq kelisim jer qoınaýyn paıdalanýshylar men aktsızdeletin taýarlardy óndirýshilerge qoldanylmaıdy.