Senatta ınklıýzııa jónindegi keńestiń otyrysy ótti
Senatta ınklıýzııa jónindegi keńestiń otyrysy ótti. Otyrysqa qatysýshylar kezdesý barysynda tóraǵany tańdady jáne aldaǵy jumys josparyn talqyǵa saldy, dep habarlaıdy Kazinform Senattyń baspasóz qyzmetine silteme jasap.
Inklıýzııa jónindegi keńes Senat janynan qurylǵan bolatyn. Bul týraly Palata Tóraǵasy Máýlen Áshimbaev osy jyldyń qyrkúıek aıynda ótken «Múgedektigi bar adamdardyń ózekti máseleleri jáne olardy sheshý joldary» taqyrybyna arnalǵandóńgelek ústel otyrysynda aıtqan bolatyn. Keńes músheleri múgedek adamdardyń ómirin jaqsartýǵa baǵyttalǵan usynystar men olardy iske asyrý joldaryn ázirleýi tıis.
Otyrys barysynda qatysýshylar keńes tóraǵasy retinde senator Lázzat Qaltaevany tańdady. Depýtat áriptesterine alǵysyn bildirip, Keńes jumysynyń negizgi baǵyttaryn atap ótti.
«Qazaqstan Prezıdenti Qasym-Jomart Toqaev múgedektigi bar adamdardyń problemalaryn sheshý máselelerine erekshe nazar aýdaryp keledi. Bul olardyń ómir súrý deńgeıin arttyrýǵa múmkindik beretin zańnamalyq jáne ınstıtýtsıonaldyq bazany jetildirýge de qatysty. Parlament Senatynda Palata Tóraǵasy Máýlen Áshimbaevtyń qoldaýymen osy sala boıynsha júıeli túrde jumystar júzege asyp otyr. Keńes memlekettik organdardyń, jergilikti ózin-ózi basqarý organdarynyń, qoǵamdyq birlestikterdiń, ǵylymı jáne basqa da uıymdardyń yntymaqtastyǵyna arnalǵan alań. Olardyń maqsaty – múgedek adamdardyń quqyqtaryn qorǵaý, olar úshin teń múmkindikter jasaý jáne ómirdiń barlyq salalaryna qatysýǵa qol jetkizýdi qamtamasyz etý», - dep atap ótti Lázzat Qaltaeva.
Kezdesýge sondaı-aq Eńbek jáne halyqty áleýmettik qorǵaý, Oqý-aǵartý, Mádenıet jáne aqparat mınıstrleriniń orynbasarlary, sondaı-aq sarapshylar men múddeli qoǵamdyq birlestik ókilderi qatysty.
