Senatta halyqaralyq kólik tasymalyn navıgatsııalyq baqylaý týraly qujat qaraldy
NUR-SULTAN. QazAqparat – QR Parlamentiniń Senaty Qarjy jáne bıýdjet komıtetiniń keńeıtilgen otyrysynda «Avtomobıl kóligi týraly» Qazaqstan Respýblıkasynyń Zańyna halyqaralyq avtomobıl tasymaldaryn qadaǵalap otyrý máseleleri boıynsha tolyqtyrýlar engizý týraly» QR Zańynyń jobasy qaraldy, dep habarlaıdy QazAqparat.
Zań jobasynyń maqsaty – navıgatsııalyq plombalar men onyń ınfraqurylymyn paıdalana otyryp, tranzıttik tasymaldardy qadaǵalap otyrý júıesin qurý, osyndaı júıeniń ulttyq operatoryn jáne onyń ózara is-qımyl jasaý. Onyń ishinde Eýrazııalyq ekonomıkalyq odaqqa múshe memleketterdiń memlekettik organdarymen ózara is-qımyl jasaý tártibin aıqyndaý bolyp tabylady.
«Qujat Qazaqstan Respýblıkasynyń memlekettik satyp alý týraly zańnamasyna sáıkes konkýrstyq negizde halyqaralyq tasymaldardy qadaǵalap otyrý júıesiniń ulttyq operatoryn aıqyndaý boıynsha QR Úkimetiniń ókilettigin aıqyndaýǵa; Qazaqstan Respýblıkasynyń aýmaǵy arqyly avtomobıl tasymaldary kezinde navıgatsııalyq plombalardy qoldaný jónindegi zańnama normalaryn bekitýge, sondaı-aq ózara is-qımyl jasaý, plombalardy jalǵa alý, jaýaptylyq máselelerin retteýge baǵyttalǵan.
Joba qabyldanǵanda navıgatsııalyq plombalardy paıdalaný negizinde qadaǵalap otyrý júıesin qurý baqylaýdy qashyqtyqtan júzege asyrýǵa, sondaı-aq taýarlar bar kólik quralynyń Qazaqstan Respýblıkasynyń jáne EAEO-ǵa múshe basqa memleketterdiń aýmaǵy arqyly tranzıtpen ótý marshrýtyn qadaǵalap otyrýǵa múmkindik beredi», - delingen Senattyń baspasóz habarlamasynda.
Qujat palatanyń qaraýyna jiberildi.
