Senatta Halyq densaýlyǵy týraly kodeks jobasy qaralady
NUR-SULTAN. QazAqparat – Parlament Senatynyń Tóraǵasy Máýlen Áshimbaevtiń tóraǵalyǵymen palatanyń Bıýro otyrysy ótti. Onda palatanyń 11 maýsymǵa josparlanǵan aldaǵy otyrysynyń kún tártibi bekitildi, dep habarlaıdy QazAqparat.
«Senatorlar aldaǵy otyrysta Qazaqstan Respýblıkasynyń «Halyq densaýlyǵy jáne densaýlyq saqtaý júıesi týraly» Kodeksi jobasyn jáne densaýlyq saqtaý máseleleri jónindegi ilespe zań jobasyn qaraýdy josparlaýda.
Odan bólek, otyrysta zańnamalyq aktilerge atqarýshylyq is júrgizýdi jáne qylmystyq zańnamany jetildirý, tsıfrlyq tehnologııalardy retteý, tutynýshylardyń quqyqtaryn qorǵaý, sondaı-aq halyqaralyq avtomobıl tasymaldaryn qadaǵalap otyrý máseleleri boıynsha engiziletin túzetýler qaralady.
Sonymen qatar, Bıýroda Májilisten kelip túsken zań jobalar salalyq komıtetterge bólinip berildi», - delingen Senattyń baspasóz habarlamasynda.
Atap aıtqanda, Qarjy jáne bıýdjet komıteti «Qazaqstan Respýblıkasynyń keıbir zańnamalyq aktilerine aýdıtorlyq qyzmet máseleleri boıynsha ózgerister men tolyqtyrýlar engizý týraly» zań jobasy boıynsha bas komıtet bolyp belgilendi.
Ekonomıkalyq saıasat, ınnovatsııalyq damý jáne kásipkerlik komıteti «Qazaqstan Respýblıkasynyń keıbir zańnamalyq aktilerine bıznes-ahýaldy jaqsartý máseleleri boıynsha ózgerister men tolyqtyrýlar engizý týraly» zań jobasyn odan ári pysyqtaýmen aınalysady.
Al «Qazaqstan Respýblıkasynyń keıbir zańnamalyq aktilerine sybaılas jemqorlyqqa qarsy is-qımyl máseleleri boıynsha ózgerister men tolyqtyrýlar engizý týraly» zań jobasy Konstıtýtsııalyq zańnama, sot júıesi jáne quqyq qorǵaý organdary komıtetine bekitildi.
«Bas komıtetterge QR Parlamenti Senatynyń basqa komıtetteriniń usynystaryn qorytý jáne osy qujattar boıynsha qorytyndylar daıyndaý tapsyryldy», - delingen aqparatta.
