Senatta erekshe qorǵalatyn tabıǵı aýmaqtar týraly qujat qaraldy

NUR-SULTAN. QazAqparat – Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine erekshe qorǵalatyn tabıǵı aýmaqtar máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.

Zań jobasy erekshe ekologııalyq, ǵylymı, tarıhı-mádenı jáne rekreatsııalyq qundylyǵy bar erekshe qorǵalatyn tabıǵı aýmaqtardyń jerin kúzetýge jáne qorǵaýǵa baǵyttalǵan.

«Búginde eldiń ekonomıkalyq damý qarqynynyń ósýi jáne tabıǵı resýrstardy paıdalanýdy kúsheıtý jaǵdaıynda bıologııalyq ártúrlilik elementi retinde biregeı tabıǵı resýrstardy saqtaý júıesin odan ári jetildirý máselesi ózekti bolyp otyr. Qaralyp otyrǵan zań jobasynyń negizgi maqsaty - týrızm obektilerin jáne erekshe strategııalyq mańyzy bar qurylystardy salý jáne olardyń jumys isteýi úshin buryn shyǵarylǵan ári maqsaty boıynsha paıdalanylmaǵan jerlerdi erekshe qorǵalatyn tabıǵı aýmaqtar quramyna qaıtarý rásimin ońaılatý. Іs júzinde mundaı jaǵdaılar «Býrabaı» memlekettik ulttyq tabıǵı parkiniń jáne Іle-Alataý memlekettik ulttyq tabıǵı parkiniń jerlerinde oryn alyp, maqsaty boıynsha paıdalanylmaǵan bosalqy jerlerdi erekshe qorǵalatyn tabıǵı aýmaqtar jerleri quramyna qaıta aýystyrý máselesi bar», - dedi senator Ábdáli Nuralıev.

Qaralyp otyrǵan zań jobasyń qabyldaý arqyly atalǵan máselelerdi sheshýmen qatar: erekshe ekologııalyq, ǵylymı, tarıhı-mádenı qundylyǵy bar ári keri qaıtarylatyn jer ýchaskelerinde ornalasqan tabıǵı keshenderdi jáne tabıǵı-qoryq obektilerin saqtaý, ekologııalyq týrızmdi damytý men tabıǵat qorǵaý mekemeleriniń óz qarajatyn ulǵaıtý múmkindikteri bolady kútilýde.

«Bizdiń paıymdaýmyzsha, Úkimet bekitetin qaǵıdalarda: jer ýchaskesin qabyldap alatyn Komıssııa qurylýy, qaıtarylatyn jerlerdiń jaǵdaıyn anyqtaý úshin arnaıy izdestirý jumystaryn júrgizilýi, orman ornalastyrý jobasynyń jasalýy qarastyrylýy qerek», - dedi depýtat.