Senatta eńbekaqyny tólemeıtinderge shara qoldaný máselesi kóterildi
«Búgingi tańda elimizde zańmen bekitilgen erejelerge qaramastan jumysshy men jumys berýshi arasyndaǵy eńbek daýlaryn jıi kezdestirýge bolady. Eńbegi baǵalanbaı, tabanaqy, mańdaı termen tapqan aqshasyn ala almaı zar ılegen azamattarymyzdyń sany azaımaýda. Kóptegen jumys berýshiler adamdardyń qıyn jaǵdaıyn paıdalana otyryp, eńbek sharttaryn jasamaı, eńbek zańnamasynyń talaptaryn buza otyryp jumysshylardy jaldap, sońynan jalaqysyn bermeýdi ádetke aınaldyra bastaǵan. Statıstıkalyq málimetter kórsetkendeı, eńbek daýlaryna qatysty sot isteri de ósýde. Máselen, 2017 jyly sottarda eńbekke aqy tóleý talaptarynyń buzylýyna qatysty 1 783 ákimshilik is, al 2018 jyly 1939 is qaralǵan, ıaǵnı mundaı ister 1 jyldyń ishinde 8,7 paıyzǵa artqan», - dep toqtaldy senator Rysqalı Ábdikerov.
QR Eńbek jáne halyqty áleýmettik qorǵaý mınıstrliginiń málimetine sáıkes, 2019 jyldyń 1 qańtardaǵy jaǵdaı boıynsha jalaqy bereshegi 139 kásiporyndaǵy 6 200 jumyskerdiń aldynda 1 mlrd 940 mln teńgeni quraǵan, onyń 77 paıyzy ıaǵnı 105-i (1,5 mlrd teńge) bankrotqa ushyraǵan kásiporyndar.
«Munyń syrtynda, ásirese búginde aýyl sharýashylyǵy salasynda jumys isteıtin jumysshylar da kezinde shartqa otyrmaǵandyqtan, jalaqylaryn ýaqtyly nemese múlde ala almaı, al keıbir jaǵdaılarda jalaqynyń ornyna aýyl sharýashylyǵy ónimderin alý faktileri de kezdesedi (bıdaı, shóp, kókenis jáne t.b.). Al munyń saldary jumysshy kúshiniń jetispeýshiligin týǵyzyp, maman kadrlardyń turaqtamaýyna ákelip soqtyrýda», - dedi depýtat.
Osy oraıda ol bul máseleni sheshý Úkimet tarapynan tikeleı aralasýdy qajet etetinin atap ótti.
Bul turǵyda birinshi kezekte jumysshylardyń jalaqysyn berý maqsatynda, sodan soń basqa da mindetti tólemderdiń ótelýin qamtamasyz etý boıynsha «Bankrottyq jáne ońaltý týraly» Zańyna ózgeris engizý; «Mindetti áleýmettik saqtandyrý týraly» Zańynyń 4-babyn 7-tarmaqshamen, ıaǵnı «Jumys berýshiniń dármensizdigi (bankrottyǵy) saldarynan tabysyn joǵaltqan jaǵdaı» degen mazmunmen tolyqtyrý usynysy jasaldy.
«Eńbekke aqy tóleý jónindegi talaptardy buzǵany úshin jaýapqa tartý sharalaryn zańnamalyq turǵyda qatańdatý boıynsha baqylaýdy kúsheıtý jáne sharýa qojalyqtaryndaǵy eńbek qatynastaryn bir júıege keltirý máselelerin qarastyrýyńyzdy suraımyn», - dedi R. Ábdikerov.
