Senatta elordany sapaly aýyz sýmen qamtamasyz etýge qatysty usynys aıtyldy

ASTANA. QazAqparat – Senator Nurlan Bekenov elimizdiń Premer-Mınıstri Álıhan Smaıylovtyń atyna joldaǵan depýtattyq saýalynda sýmen jabdyqtaý jáne halyqty aýyz sýmen qamtamasyz etý salasyndaǵy problemany atady, dep habarlaıdy QazAqpapar tilshisi.

Depýtat Astanany sýmen jabdyqtaý jalǵyz kózden – Astana sý qoımasy arqyly júzege asyp jatqanyna toqtaldy. Ol 1969 jyly salynǵan jáne 500 myń adamǵa eseptelgen bolatyn. Degenmen, elorda halqy bul kórsetkishten áldeqashan asyp ketken.

«Qalanyń qarqyndy damýyna, sondaı-aq halyq sanynyń únemi ósip otyrýyna baılanysty sýǵa degen suranys jyl saıyn artyp keledi. Astana sý qoımasynyń resýrsy tolyq sarqylǵan jaǵdaıda, elordaǵa balama sý kózin tartý turǵyndardy sapaly aýyz sýmen qamtamasyz etý úshin qajet. Osy oraıda qazirden bastap halyqty sapaly sýmen qamtamasyz etý máselelerin sheshýdiń balama joldaryn qarastyryp, josparlaý qajet dep sanaımyn», - dedi senator N. Bekenov.

Senator Nura jer asty sýy ornyn ıgerýdi jáne onyń uzaq merzimdi paıdalaný nátıjesinde apatty jaǵdaıda turǵan ınfraqurylymyn qaıta jańǵyrtýdy usyndy.

Depýtat Memleket basshysynyń Úkimetke Buzylyq sý qoımasyn salý týraly usynysty zerdeleý jáne engizý jónindegi tapsyrma bergenin eske saldy. Senator Buzylyq sý qoımasynyń qurylysy sý tasqyny qaýpin azaıtýǵa, Esil ózeniniń aǵynyn retteýge jáne Aqmola, Qostanaı, Soltústik Qazaqstan oblystarynyń sý qorlaryn ulǵaıtýǵa múmkindik beredi dep esepteıdi.

«Turǵyndardy sýmen úzdiksiz qamtamasyz etý maqsatynda, sondaı-aq elordany sýmen qamtamasyz etýdiń qosymsha baǵyttaryn eskere otyryp, Nura jáne Buzylyq sý qoımalarynda qysqa merzimde qaıta jańǵyrtý men qajet jumystardy atqarý, kerek», - dedi senator.

Budan buryn habarlanǵandaı, úsh jylda elimizde 9 jańa sý qoımasy salynady.