Senatta elimizdegi ákimshilik ádilettiń qalyptasýy taqyrybynda halyqaralyq konferentsııa ótýde

Eki kúnge jalǵasatyn alqaly jıynǵa Parlament depýtattary, Konstıtýtsııalyq Keńes Tóraǵasy, EQYU-nyń Astanadaǵy ortalyǵynyń basshysy, QR Prezıdenti Ákimshiliginiń, QR Joǵarǵy Sotynyń ókilderi jáne basqa da memlekettik organ qyzmetkerleri qatysýda. Basqosýdyń qonaǵy Bremen ýnıversıtetiniń (Germanııa) professory, quqyq doktory Knıper Rolf, EQYU ókilderi jáne taǵy basqalar bolyp otyr, dep habarlaıdy QazAqparat.

«Jıyndy ótkizýdegi negizgi maqsat Qazaqstan Respýblıkasynda ákimshilik ádiletiniń qalyptasýyna qatysty problemalardy, ózekti máselerdi talqylaý bolyp tabylady. Naryqtyq qatynastardyń damýymen birge elimizdiń zańnamalyq bazasy da jetile túsýde, bul rette eń aldymen sot qurylysy jáne sot óndirisi týraly zańnamalar ózgeristerge ushyrady. Áli de osyǵan baılanysty máseleler jetkilikti. Sondyqtan da, ákimshilik sot óndirisi quqyǵy salasyn reglamentteýge qatysty Parlamentke usynylǵan zań jobalarynda Ákimshilik quqyq buzýshylyq týraly kodekske, Ákimshilik protsessýaldyq kodekske ózgerister engizý qarastyrylǵan. Osyǵan oraı, bul baǵyttaǵy erejelerdi talqylap, olqylyqtardy anyqtaý men ony joıý jónindegi usynymdar ázirleý bizdiń búgingi basqosýda kóteriletin áńgimeniń negizgi arqaýy bolmaq», dedi QR Parlamenti Senaty Zańnama jáne quqyqtyq máseleler komıtetiniń tóraǵasy Berik Imashev.

Jıyn barysynda halyqaralyq konferentsııaǵa qatysýshylar tarapynan usynymdar ázirleý úshin uıymdastyrý komıteti quryldy.

Eki kúnge jalǵasatyn jıyn barysynda ákimshilik is júrgizýdegi ákimshilik ádilettilik problemalary, atalǵan saladaǵy adam quqyqtaryn qorǵaýdyń tıimdi tetikteri taqyryptarynda baıandamalar jasalyp, ákimshilik ádilettiń shetelderde qoldaný tájirıbesi talqylanatyn bolady.