Senatta «EQYU-nyń eýrazııalyq ólshemi» Transazııalyq parlamenttik jıynyn ázirleý jáne ony ótkizý jónindegi Uıymdastyrý komıtetiniń otyrysy boldy
STANA. Naýryzdyń 17-si. QazAqparat - Búgin Parlament Senatynyń Tóraǵasy Qasym-Jomart Toqaevtyń tóraǵalyq etýimen ústimizdegi jylǵy 14-16 mamyrda Almatyda ótetin «EQYU-nyń eýrazııalyq ólshemi» Transazııalyq parlamenttik jıynyn ázirleý jáne ony ótkizý jónindegi Uıymdastyrý komıtetiniń otyrysy boldy. Qazaqstannyń EQYU-na tóraǵalyq etýi aıasynda ótetin bul shara osy uıymnyń járdemimen bolady,
dep habarlaıdy Senattyń baspasóz qyzmeti.
Jıyndy ázirleý jáne ony ótkizý jónindegi sharalar josparynyń oryndalý barysy týraly Uıymdastyrý komıteti jumys tobynyń jetekshisi, Senat Apparatynyń Basshysy Murat Nurtileýov baıandady.
Jıyn baǵdarlamasynda úsh: «Óńirlik qaýipsizdik (Aýǵanstan, terrorızm jáne esirtki tasymalymen kúres, qarýsyzdaný)», «Eýrazııa: jańa naryqtar jáne qaterlerdiń arta túsýi (ekonomıkalyq damý, saýda, resýrstardy basqarý, eńbek kóshi-qony, qorshaǵan ortany qorǵaý salasyndaǵy máseleler)» jáne «EQYU-nyń adamı ólshemderi (dinı toleranttyq, saıası damý, adamdar saýdasymen kúres, genderlik teńdik)» sessııalaryn ótkizý qarastyrylǵan.
Transazııalyq parlamenttik jıynǵa álem qoǵamdastyǵyndaǵy elderdiń ulttyq parlamentteri men halyqaralyq uıymdar ókilderiniń 350-ge jýyq delegat keletin boldy.
Uıymdastyrý komıtetiniń tóraǵasy Qasym-Jomart Toqaev bizdiń elimizdiń EQYU-na tóraǵalyq etý aıasyndaǵy Transazııalyq parlamenttik jıynnyń Qazaqstanda ótýiniń saıası zor mańyzyna otyrysqa qatysýshylar nazaryn aýdardy. «Bul jıyn parlamentaralyq únqatysý men yntymaqtastyqty odan ári keńeıtýge, EQYU-nyń basty mindetterin sheshýde parlamentshilerdiń is-qımylyn belsendilendirý men rolin arttyrýǵa baǵyttalǵan»,-dedi tóraǵa.
