Senatta EAEO týraly shartqa ózgerister engizýge qatysty zań jobasy qaralady

ASTANA. KAZINFORM - Senat Tóraǵasy Máýlen Áshimbaev Palata Bıýrosynyń otyrysyn ótkizdi. Onda depýtattar 8 aqpanda ótetin Senat otyrysynyń kún tártibin bekitti, dep habarlaıdy QR Parlamenti Senatynyń baspasóz qyzmeti.

Soǵan sáıkes aldaǵy Palata otyrysynda senatorlar «2014 jylǵy 29 mamyrdaǵy Eýrazııalyq ekonomıkalyq odaq týraly shartqa elektrondyq nysanda qyzmetter kórsetý kezinde janama salyqtar alý tártibin aıqyndaý bóliginde ózgerister engizý týraly hattamany ratıfıkatsııalaý týraly» zańdy qaraıdy.

Zań salyq esebine ońaılatylǵan jolmen qoıýdyń jáne elektrondyq qyzmetterge qosylǵan qun salyǵyn tóleýdiń ulttyq tetigin engizýdi kózdeıdi. Sondaı-aq atalǵan qujat Eýrazııalyq ekonomıkalyq odaq ishinde de, QQS tóleýdiń ashyq jáne naqty tetigi bar úshinshi eldermen de salyq salýdyń teń jaǵdaılaryn qalyptastyrýǵa yqpal etýge tıis.

Sonymen qatar «Qazaqstan Respýblıkasynyń Úkimeti men Estonııa Respýblıkasynyń Úkimeti arasyndaǵy adamdardyń readmıssııasy týraly kelisimdi ratıfıkatsııalaý týraly» zań da Senat otyrysynyń kún tártibine shyǵaryldy.

Zań normalary zańsyz kóshi-qonǵa qarsy is-qımyl salasynda Qazaqstan men Estonııanyń quzyretti organdary arasynda tıimdi yntymaqtastyqtyń quqyqtyq negizin qalyptastyrýǵa, Taraptar bolyp sanalatyn memleketterdiń aýmaǵynda kelý, bolý, turý sharttaryn oryndamaıtyn nemese oryndaýdy toqtatqan adamdardy sáıkestendirýdiń jáne qaıtarýdy uıymdastyrýdyń ońtaıly rásimderin belgileýge, sondaı-aq, osyndaı adamdardyń tranzıtin jeńildetýge arnalǵan.

Odan bólek, Bıýro otyrysynda Májilisten kelip túsken zańdar Senattyń turaqty komıtetterine bólinip berildi.