Senatta EAEO-ǵa Qyrǵyzstannyń qosylý shartyna engiziletin ózgerister talqylandy
ASTANA. QazAqparat - Parlament Senaty Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda «2014 jylǵy 29 mamyrdaǵy Eýrazııalyq ekonomıkalyq odaq týraly shartqa Qyrǵyz Respýblıkasynyń qosylýy týraly 2014 jylǵy 23 jeltoqsanda qol qoıylǵan shartqa ózgeris engizý týraly hattamany ratıfıkatsııalaý týraly» zań jobasy qaraldy, dep habarlaıdy QazAqparat.
«Halyqaralyq sharttar týraly Zańǵa sáıkes, hattama ratıfıkatsııalaýǵa jatady. Eýrazııalyq ekonomıkalyq odaqqa Qyrǵyz Respýblıkasynyń qosylýy týraly sharttyń 8 babyna sáıkes, qoldanystaǵy kedendik ákelý bajdarynyń somalaryn bólýdiń qoldanystaǵy normatıvteriniń merzimi 2018 jylǵy 12 tamyzǵa deıin dep belgilengen. Osy hattama kórsetilgen qoldanystaǵy normatıvterdi 2019 jylǵy 31 jeltoqsanǵa deıin uzartady. Bul kedendik ákelý bajdary somalaryn bólýdiń qalyptasqan rejimin saqtaý maqsatynda qajet», - dedi Ulttyq ekonomıka vıtse-mınıstri Rýslan Dálenov.
Halyqaralyq sharttar týraly Zańǵa sáıkes, osy hattama 2018 jylǵy 12 tamyzdan bastap ýaqytsha qoldanylatynyn atap ótý qajet.
Vıtse-mınıstrdiń sózine qaraǵanda, jańa normatıvter arnaıy komıssııa deńgeıinde aǵymdaǵy jyldyń barysynda talqylanady.
Atap aıtqanda, hattamada qoldanystaǵy kedendik ákelý bajdarynyń somalaryn, ıaǵnı Armenııa Respýblıkasy - 1,220 paıyz, Belarýs Respýblıkasy - 4,560 paıyz, Qazaqstan Respýblıkasy - 7,055 paıyz, Qyrǵyz Respýblıkasy - 1,900 paıyz, Reseı Federatsııasy - 85,265 paıyz deńgeıinde bólý normatıvterin bıyldyń sońyna deıin uzartý kózdelip otyr.
Talqylaýdan keıin komıtet músheleri zań jobasyn Senattyń jalpy otyrysyna jiberý týraly sheshim shyǵardy.
