Senatta depýtattardyń óńirlerde jergilikti turǵyndarmen kezdesýleri qorytyndylandy
ASTANA. KAZINFORM – Senat spıkeri Máýlen Áshimbaevtyń tóraǵalyǵymen Palata Bıýrosynyń otyrysy ótti. Onda senatorlar 23 qańtarda bolatyn Senat otyrysynyń kún tártibin bekitti. Sondaı-aq depýtattardyń jeltoqsan, qańtar aılarynda uıymdastyrylǵan óńirlerge saparlary kezindegi jergilikti turǵyndarmen kezdesýleri qorytyndylandy. Bul týraly Parlament Senatynyń baspasóz qyzmeti habarlady.
Palata tóraǵasy senatorlar halyqpen kezdesýlerde kóterilgen ózekti problemalardy depýtattyq saýaldarǵa arqaý etip, olardy sheshýge belsendi atsalysý kerek ekenin atap ótti.
– Jergilikti turǵyndarmen kezdesýlerde azamattarymyz ózderin alańdatqan ózekti máselelerdi kóterdi. Óńirlerdiń múddesin qorǵaıtyn Palatanyń depýtattary retinde senatorlar aımaqtardy damytý máselesine erekshe mán berýi qajet. Sol sebepti, aldaǵy ýaqytta issaparlardyń nátıjesi boıynsha mańyzdy depýtattyq saýaldar jarııalanyp, azamattardyń usynystary Palatanyń zań shyǵarý qyzmetinde eskeriledi dep senemin, - dedi Máýlen Áshimbaev.
Sonymen qatar Bıýro otyrysynda osy aptada ótkiziletin is-sharalar talqylandy. Bul aptada EAEO-nyń ishki shekarasynda shekaralyq ótkizý pýnktterin rekonstrýktsııalaý jáne salýǵa, salyqtyq jáne kedendik aqparattyq júıelerge, azamattardy ártúrli aýyl sharýashylyǵy daqyldaryn ósirýge úıretý úshin ortalyqtar qurý jáne olardyń jumys isteýine qatysty máseleler boıynsha múddeli memlekettik organdarmen kezdesýler josparlanǵan. Sondaı-aq Densaýlyq saqtaý júıesin tsıfrlandyrý jáne medıtsınalyq saqtandyrýdy damytý máselelerine arnalǵan Senat komıtetiniń keńeıtilgen otyrysy ótedi.
Otyrys kezinde Bıýro músheleri Palatanyń aldaǵy beısenbide bolatyn otyrysynyń kún tártibine «Qazaqstan Respýblıkasynyń keıbir zańnamalyq aktilerine mádenıet, bilim berý jáne tálimgerlik máseleleri boıynsha ózgerister men tolyqtyrýlar engizý týraly» zańdy shyǵardy.
Bul zańnyń normalary memlekettik tildi qoldaný aıasyn keńeıtý, onyń mártebesin nyǵaıtý, bala quqyqtaryn qorǵaý jáne bilim berý salasyndaǵy ulttyq zańnamany odan ári jetildirýge arnalǵan.