Senatta tsıfrlyq tólem júıesin engizý máselesi talqylandy

NUR-SULTAN. QazAqparat - Senattyń Qarjy jáne bıýdjet komıtetiniń depýtattary «Ulttyq tólem júıesin engizý. Tsıfrlyq teńge – kútiletin nátıjeler men damytý perspektıvalary» taqyrybyna arnalǵan dóńgelek ústel otyrysyn ótkizdi, dep habarlaıdy QazAqparat joǵary palatanyń baspasóz qyzmetine silteme jasap.

2020 jylǵy 24 qańtarda Memleket basshysy Qasym-Jomart Toqaev Úkimettiń keńeıtilgen otyrysynda qarjy naryǵyna qatysýshylardy ózara tıimdi sharttarmen tarta otyryp, ulttyq tólem júıesin qurýǵa kirisý qajettigin atap ótken bolatyn.

Senator Serikbaı Trumov dóńgelek ústel jumysyn asha kelip, qolma-qol aqshasyz tólemderdiń úlesi jyl saıyn turaqty ósip kele jatqanyn jáne 2021 jyldyń sońyna qaraı tólemderdiń jalpy somasynyń shamamen 77%-yn quraǵanyn atap ótti. Onyń aıtýynsha, ulttyq tólem júıesin damytý teńgeniń qolma-qol aqshasyz aınalymyna odan da qolaıly jaǵdaı jasaıtyn bolady.

«Qazaqstanda tólem keńistigi qurylady dep kózdelip otyr. Sonyń arqasynda qolma-qol aqshasyz tólemderdiń qaýipsizdigi artady, esep aıyrysýdyń jyldamdyǵy jaqsarady, naryqtyń barlyq qatysýshylary úshin tranzaktsııalar quny tómendeıdi. Sonymen qatar ulttyq tólem júıesin damytý otandyq bank júıesiniń syrtqy qaterlerge táýeldi bolýyn azaıtady, otandyq bankterdiń básekege qabilettiligin arttyrady, sondaı-aq otandyq qarjy júıesiniń qaýipsiz jumys isteýin qamtamasyz etedi», - dep atap ótti Serikbaı Trumov.

Dóńgelek ústel otyrysy barysynda tólem júıesi elimizdiń qarjy júıesiniń mańyzdy quramdas bólikteriniń biri bolyp tabylatyny jáne onyń úzdiksiz jumys isteýi – memlekettiń strategııalyq mindeti ekeni atap ótildi. Senatorlar osyǵan baılanysty tsıfrlyq ulttyq valıýtany engizý tetikterin muqııat zerdeleý men pysyqtaýdyń mańyzdylyǵyn atap ótti. Qolma-qol aqshasyz aınalym kóleńkeli ekonomıka deńgeıin tómendetýge yqpal etýi yqtımal ekeni eskerildi.

Parlamentshiler dóńgelek ústeldiń qorytyndysy boıynsha ulttyq bank basshylyǵyna jáne múddeli mekemelerge jiberiletin usynymdar ázirledi.