Senatta bıznes máselelerine arnalǵan parlamenttik tyńdaý ótedi
ASTANA. QazAqparat - Ortalyq kommýnıkatsııalar qyzmetiniń resmı ókili Murat Jumanbaı Parlament palatalarynyń osy aptadaǵy josparyn jarııalady, dep habarlaıdy QazAqparat tilshisi.
"Aqpannyń 24-i kúni QR Parlament Senatynda otandyq bıznestiń múddeleri men quqyqtaryn qorǵaý, "Atameken" ulttyq kásipkerler palatasy men memlekettiń osy saladaǵy ózara is-qımylyn qamtasyz etý zańnamasy taqyrybynda parlamenttik tyńdaý ótedi", - dedi Jumanbaı búgingi brıfıngte.
Al aqpannyń 22-si kúni Parlament Májilisiniń plenarlyq májilisi bolady. Onda Embi polıgonyna qatysty tıisti qujattardyń zańdy kúshin toqtatý jónindegi sharalar týraly Qazaqstan men Reseı arasyndaǵy xattamany qarastyrady.
"Plenarlyq otyrystyń kún tártibinde profıldi komıtetterge jańa zań jobalarynyń qorytyndysyn daıyndaý merzimin belgileý kózdelgen. Atap aıtsaq, memlekettik bilim berý jınaqtary máselesi boıynsha zańnamalyq túzetýler, Qazaqstan men Azııa damý banki arasynda Aqtóbe-Maqat jolyn jóndeý úshin zaem jónindegi kelisim jobasy, sondaı-aq tabıǵı teriden jasalǵan kıimder, kıimniń kerek-jaraqty jáne ózge de buıymdardy tańbalaýǵa arnalǵan pılottyq jobany uzartý týraly xattama bar. Sondaı-aq palata elektr energetıkasy máseleleri jónindegi zańnamalyq túzetýler boıynsha júrgizilip jatqan jumystardy jalǵastyrý jaıyn da qarastyratyn bolady", - dep atap kórsetti Jumanbaı.
Aıta keteıik, búgingi brıfıngte Murat Jumanbaı Jambyl oblysyndaǵy qaıǵyly oqıǵaǵa baılanysty qurylǵan tergeý komıssııasynyń quramyn jarııalady . Búginnen bastap Ortalyq kommýnıkatsııalar qyzmetindegi aptalyq brıfıngter jańa formatta ótetin boldy. Jumanbaıdyń aıtýynsha, aǵymdaǵy aptada bes birdeı mınıstr esep beredi.
