Senatta beıbit jınalystardy uıymdastyrýǵa qatysty qujat qaraldy
«Búginde beıbit jınalystar men mıtıngiler ótkizý tártibi týraly» qoldanystaǵy Zańnyń qabyldanǵanyna 25 jyl ótti. Osy jyldar ishinde elimizdiń áleýmettik-ekonomıkalyq salasynda úlken ózgerister boldy. Memleket basshysy Qazaqstan halqyna Joldaýynda atap ótkendeı, elimizdiń qoǵamdyq-saıası ómirin jańǵyrtpaı, ekonomıkalyq reformalardy tabysty júzege asyrý múmkin emes.
Qoǵamnyń suranysyna sáıkes, beıbit jınalystar arqyly óz ustanymyn bildirý úshin azamattardyń múmkindikterin aıtarlyqtaı keńeıtý qajettigi paıda boldy»,- dedi QR Aqparat jəne qoǵamdyq damý mınıstri Dáýren Abaev.
Onyń sózine qaraǵanda, sondyqtan másele qoldanystaǵy zańǵa ózgerister engizý týraly ǵana bolyp otyrǵan joq, bul barlyq beıbit jınalys túrlerin uıymdastyrý men ótkizý máselelerin retteıtin tujyrymdamalyq turǵydan jańa zań jobasy qamtyp otyr.
«Biz AQSh, Ulybrıtanııa, Frantsııa, Aýstralııa, Japonııa, Sıngapýr, Shvetsııa jáne Reseı sııaqty elderdiń osy atalǵan saladaǵy zańnamalaryn muqııat zerdeledik. Halyqaralyq tájirıbege sáıkes, álemniń kóptegen elderi beıbit mıtıngini uıymdastyrý jáne ótkizýde basty basymdyqty qoǵamdyq qaýipsizdikke beredi. Biz qoǵamdyq pikirdi, sonyń ishinde áleýmettik jelilerdi zerdeledik, áleýmettik zertteýler júrgizdik», - dedi mınıstr.
Zań jobasynyń negizgi erejelerine toqtalǵan mınıstr, birinshiden, beıbit jınalystardyń negizgi qaǵıdattary zańnamalyq deńgeıde engizilýde. Osy oraıda zorlyq-zombylyqsyz sıpat; zańdylyq; memlekettik qaýipsizdikti, qoǵamdyq tártipti, densaýlyq saqtaýdy, basqa adamdardyń quqyqtary men bostandyqtaryn qorǵaýdy qamtamasyz etý; qatysý eriktiligi eskerilgen.
Ekinshiden, zań jobasyna túsinik apparatyn engizý. Qazirgi qoldanystaǵy zańnyń kemshiliginiń biri – beıbit jınalys nysandary naqty reglamenttelmegen. Osyǵan baılanysty zań jobasynda túsinik apparatyn engizý usynylady. Bul mıtıng, pıketteý, jınalys, demonstratsııa, sherý sııaqty negizgi uǵymdardy qalyptastyrýǵa jáne olardy ózara ajyratýǵa múmkindik beredi.
Qujatta beıbit jınalystardy mamandandyrylǵan oryndarda ótkizý qarastyrylǵan. Beıbit jınalystar ótkizetin arnaıy oryndardy jergilikti ókildi organ belgileıdi. Mundaı oryndarǵa birqatar talaptar qoıylǵan. Mysaly, qala men aýyldardyń ortalyǵynda bolýy, beıbit jınalystyń maqsatyna qol jetkizýge múmkindikter jasalýy, uıymdastyrýǵa yńǵaıly bolýy, uıymdastyrýshy men qatysýshylardyń ınfraqurylym nysandaryn paıdalaný múmkindiginiń bolýy, sanıtarlyq normalar men erejelerdiń saqtalýy, beıbit jınalysty uıymdastyrýshy men qatysýshylardyń jáne basqa da adamdardyń qaýipsizdigi qamtamasyz etilýi tıis.
Sonymen qatar, búgingi jalpy otyrysta «Qazaqstan Respýblıkasynyń keıbir zańnamalyq aktilerine Qazaqstan Respýblıkasynda beıbit jınalystardy uıymdastyrý jáne ótkizý tártibi máseleleri boıynsha ózgerister men tolyqtyrý engizý týraly» ilespe zań jobasy da birinshi oqylymda maquldandy.
