Senatta Batys Qazaqstan oblysyndaǵy ótkizý beketteriniń máselesi kóterildi
Depýtattyń aıtýynsha, 2016 jylǵy qazanda ótken Qazaqstan men Reseı arasyndaǵy HІІІ óńiraralyq yntymaqtastyq forýmynda Elbasy elimizdiń Úkimetine Qazaqstan-Reseı shekarasyndaǵy baqylaý-ótkizý pýnktterin jańǵyrtý, sondaı-aq «Fomın» jáne «Molodost» jeńildetilgen ótkizý pýnktteriniń mártebesin ekijaqty avtomobıl ótkizý pýnktterine ózgertý týraly tapsyrma bergen bolatyn. Osy sharalardyń barlyǵy 2018 jyldyń 15 jeltoqsanyna deıin júzege asýy tıis edi.
Senator atalǵan tapsyrmanyń oryndalmaýyna baılanysty depýtattar bul máseleni birneshe ret kóterip, depýtattyq saýaldar joldaǵanyn atap ótti.
Narıman Tóreǵalıevtiń sózine qaraǵanda, bul máseleni sheshý ótkizý beketterindegi uzyn-sonar kezekterden arylýǵa jáne óńirdiń ekonomıkalyq ósýine jańa serpin berýge kómekteser edi.
«Jánibek aýdanynyń «Jánibek-Vıshnevka» ótkizý pýnktine kóp jaqty halyqaralyq ótkizý pýnkti mártebesin, al Bókeı Ordasy aýdanynyń «Molodost-Verhnıı Baskýnchak» jáne Kaztalov aýdanynyń «Fomın» ótkizý pýnktterine ekijaqty avtomobıl ótkizý pýnkti mártebesin berý máselesiniń sheshilýine jáne Ónege-Bısen-Saıqyn respýblıkalyq mańyzy bar tas jolyn Saıqyn-Shońaı-Molodost (50 km) shekara beldeýine deıin uzartyp, «QazAvtoJol» UK» AQ esebine berý arqyly jergilikti mańyzy bar joldan respýblıkalyq mańyzy bar jol mártebesine aýystyrýǵa yqpal etýińizdi suraımyz» - dedi depýtat Senattyń jalpy otyrysynda.