Senatta balama sot ádildiginiń problemalary talqylandy
ASTANA. Naýryzdyń 16-sy. QazAqparat /Qanat Mámetqazyuly/ - Búgin QR Parlamenti Senaty Zańnama jáne quqyqtyq máseleler komıtetiniń músheleri aralyq sottardyń jáne tórelik organdarynyń ókilderimen (treteılik sot pen arbıtrajdy organ) kezdesti.
Onda balama sot ádildigi problemalary talqylandy, dep habarlaıdy QazAqparat.Álemdik tájirıbede kommertsııalyq jáne azamattyq-quqyqtyq daý-damaılardy sotqa deıingi sheshýdiń balamaly túri aralyq jáne tórelik sot oryndary bolyp tabylady. Bundaı sottardyń negizgi basymdyǵy daýlardy jeńildetilgen tártippen qaraý, sot úderisiniń shapshańdyǵy men únemdiligi, daý sheshýdegi tórelik jasaýshynyń ádildigi men ashyqtyǵy, bundaı sot sheshimderiniń oryndylyǵy, aralyq sottardy erkin tańdaý quqy, tórelik sotta qaralǵan máselelerdiń qupııalylyǵyn qamtamasyz etý sekildi máselelermen baılanysty bolyp tabylady. Órkenıet áleminde jalpyǵa moıyndalǵan aralyq sottar sheteldik ınvestorlar úshin kepildiktiń negizgi kózi bolyp tabylady. Sondyqtan da, Qazaqstan óz táýelsizdigin alyp, naryqtyq ekonomıkaǵa baǵdar ustaǵannan keıin, sheteldik ınvestorlardy tartý júrgizilgennen bastap elimizde aralyq sotttar engizile bastady. Búgingi kúni Qazaqstanda shamamen alǵanda 15-ke jýyq aralyq sottar qyzmet etedi. Aralyq sottar quramynda búgingi kúni turaqty jumys isteıtin, táýelsiz, memlekettik emes organ bolyp tabylatyn Qazaqstan Respýblıkasynyń Halyqaralyq Aralyq soty qyzmet etedi. Qazirgi kúnge deıin Qazaqstannyń aralyq jáne tórelik sottary otandyq, halyqaralyq quqyq normalary boıynsha, sondaı-aq kez kelgen memlekettiń quqy boıynsha daý-damaılardy qarap keledi. Al bundaı sottardyń qyzmetin basym jaǵdaıda munaıgaz salasynyń jetekshi kompanııalary, taý-ken óndirisi, banktik, qurylys isteri salasyndaǵy jáne basqa da sektordaǵy kompanııalar paıdalanýda. Komıtette ótken pikir almasý sıpatyndaǵy kezdesý barysynda aralyq jáne tórelik sottardy tájirıbede keńinen engizý, olardyń zańnamalyq qoldanylýyn jetildirý máseleleri talqylandy. Jıynǵa qazaqstandyq jáne halyqaralyq aralyq uıymdar (sottar) ókilderi qatysty.
