Senatta azyq túlik qaýipsizdigin baqylaý máselesi sóz boldy

ASTANA. KAZINFORM — QR Parlamenti Senatynyń depýtaty Bıbıgúl Jeksenbaı oqý-aǵartý, densaýlyq saqtaý, saýda jáne ıntegratsııa, qarjy, mádenıet jáne aqparat mınıstrlikteriniń, sondaı-aq «Qazaqstan respýblıkalyq tutynýshylar qaýymdastyǵy» zańdy tulǵalar birlestiginiń ókilderimen kezdesti.

Halyqtyń densaýlyǵyn jaqsartý máselesi – kezdesýdiń basty taqyryby boldy. 
Bıbigúl Jeksenbaı kezdesý barysynda Dúnıejúzilik densaýlyq saqtaý uıymynyń málimetteri boıynsha, adam óliminiń 60%-y qaýipti qospamen daıyndalǵan sapasyz taǵamnan týyndap otyrǵanyn atap ótti.

«Basty másele shetelden keletin zııandy taǵamdardyń shekaramyzdan ótip ketýi. Qazaqstan Respýblıkasynyń Zańyna sáıkes taýardyń syrtynda qazaq nemese orys tilinde aýdarmalary bolýy shart ári mindet. Biraq bizdiń túsinbeı otyrǵanymyz syrttan keletin «qoqys» taǵamnyń syrtynda birde-bir memlekettik nemese resmı tilde aýdarmanyń joqtyǵy. Ony elimizdiń mektep oqýshylarynyń qolyn sozǵan jerde alýy alańdatyp otyr», - dedi Bıbıgúl Jeksenbaı.

Densaýlyq saqtaý mınıstrliginiń ókili óz kezeginde juqpaly emes aýrýlardyń aldyn alý jáne azamattar men óskeleń urpaqtyń densaýlyǵyn saqtaý jáne nyǵaıtý jónindegi sharalardy iske asyrý sala qyzmetiniń negizgi baǵyty bolyp tabylatynyn atap ótti. Oqýshylardyń durys tamaqtanýyn uıymdastyrýǵa qajetti quqyqtyq baza sol úshin jasaldy. Oqýshylardy vıtamınder men mıneraldarmen baıytylǵan ónimderdi qosyp tamaqtandyrý jónindegi biryńǵaı standart boıynsha ádistemelik usynystar ázirlendi.