Senatta aýrýhanalardy qarjylandyrýda qandaı kemshilikter bar ekeni aıtyldy

Búgin Senattyń jalpy otyrysynda depýtat Bıbigúl Jeksenbaı aýrýhanalar men emhanalardy áleýmettik medıtsınalyq saqtandyrý qory jaǵynan qarjylandyrý máseleleri týraly aıtty. Bul turǵyda Premer-Mınıstrdiń orynbasary Tamara Dúısenovanyń atyna saýal joldady, dep habarlaıdy QazAqparat tilshisi.

Depýtattyń sózine qaraǵanda, kóptegen emdeý mekemelerinde qordan qarjylandyrý belgilengen somadan 60 paıyzdan 80 paıyzǵa deıin jyldan jylǵa tómendep bara jatqany baıqalyp otyr. Nátıjesinde olar qalypty jumys isteı almaı keledi, jańa tehnologııalardy engize almaıdy, qyzmetkerlerdi yntalandyrýǵa múmkindigi joq.

Senatordyń aıtýynsha, jyldyq ótinimge sáıkes Áleýmettik medıtsınalyq saqtandyrý qory jaǵynan qarjylandyrýdy tolyq kólemde júrgizý kerek.

«Medıtsınalyq uıymdar jyl saıyn burynǵy kólemde ótinish beredi. Al atalǵan qordan qarjylandyrý azaıyp barady. Ekinshiden, tegin medıtsınalyq kómektiń kepildik berilgen kólemine bólingen qarajat jyl saıyn tolyq ıgerilmeı qalatyndyqtan, ony áleýmettik medıtsınalyq saqtandyrý qorynyń toptamasymen biriktirgen jón», - dedi B. Jeksenbaı.

Onyń paıymynsha, naýqastardy emdeýde tek negizgi dıagnoz boıynsha ǵana emes, sonymen qatar basqa da ilespe aýrýy úshin de dárigerlerge aqy tóleý mańyzdy.

«Eger naýqasta negizgi aýrýymen qatar ilespe syrqaty bolǵan jaǵdaıda, ol emdelgen kezde barlyq em-dom úshin tólem jasalýy kerek. Máselen, naýqas pnevmonııa dıagnozymen aýrýhanaǵa túskende, tarıf boıynsha 120 000 teńge soma bólinedi. Al ol naýqasta ilespe patologııa, qant dıabeti, arterııalyq gıpertenzııa jáne basqa da aýrýlary anyqtalsa, ÁMSQ-dan qarajat bólinbeıdi. Óıtkeni aqparattyq júıege tek negizgi dıagnoz ǵana jazylady. Al emdeý mekemesi osyndaı patsıentke 120 000 teńgeniń ornyna barlyq ilespe aýrýlaryn emdeýge 300 000 - 500 000 teńge jumsaıdy», - dedi depýtat.