Senatta asyl tuqymdy mal basy sanynyń ósimin jedeldetýge arnalǵan qujat qaraldy
«Birinshiden, ýákiletti organnyń quzyretin keńeıtý eskerilgen. Atap aıtqanda, 13-bapta ókiletti organnyń quzyreti tıisti mindettermen tolyqtyrylady. Osy oraıda janýarlarǵa qatysty ındekstik baǵalaýdy júrgizý erejelerin ázirleý jáne bekitý, janýarlarǵa molekýlıarlyq genetıkalyq saraptama júrgizý qaǵıdalaryn ázirleý, genomdyq baǵalaý júrgizý qaǵıdalaryn ázirleý jáne bekitý qamtylady. Baǵalaýdyń bul ádisteri damyǵan elderde asyldandyrý isindegi keńinen qoldanylatyn jańa baǵyttarǵa jatqyzylady. Biz olardy mal sharýashylyǵynyń genetıkalyq áleýetin jedel arttyrý máselelerinde jumystyń sapaly jańa deńgeıine kóshý maqsatynda damytýymyz kerek», - dedi Aýyl sharýashylyǵy mınıstri Erbol Qarashókeev.
Onyń aıtýynsha, aýyl sharýashylyǵy baǵytyndaǵy ǵylymı-zertteý uıymdarynyń ókilettikterin kúsheıtý qarastyrylyp otyr. Atap aıtqanda, olarǵa selektsııalyq jáne ónimdilikti arttyrý jumysynyń aqparattyq bazasyn júrgizý fýnktsııalary beriledi, sondaı-aq atalǵan uıymdar ókiletti organmen birlesip jańa normatıvtik quqyqtyq aktilerdi ázirleýge qatysatyn bolady.
«Atap aıtqanda, «molekýlıarlyq genetıkalyq saraptama» jańa baby engizildi. Onda atalǵan saraptamany júrgizý kezindegi negizgi erejeler, tapsyrys berýshiniń (janýar ıesiniń) jáne mamandandyrylǵan zerthananyń quqyqtary men mindetteri kórsetiledi», - dedi mınıstr.
Zań jobasynyń taǵy bir jańashyldyǵyna toqtalsaq, asyl tuqymdy ortalyqtarǵa uryq satyp alý múmkindigin berý eskerilgen.
Budan basqa, zań jobasy «Agroónerkásiptik keshendi jáne aýyldyq aýmaqtardy damytýdy memlekettik retteý týraly» jáne «Bıootyn óndirisin jáne aınalymyn memlekettik retteý týraly» Qazaqstan Respýblıkasynyń zańdaryna ózgerister men tolyqtyrýlar engizý boıynsha jańa tarmaqtarmen tolyqtyrylǵan.
«Jalpy qarastyrylyp jatqan Zań jobasyndaǵy barlyq qabyldanyp jatqan túzetýler ósirilip otyrǵan mal tuqymdarynyń genetıkalyq áleýetiniń dengeıin arttyrýǵa, asyl tuqymdy selektsııalyq jumystardyń sapasyn jetildirýge, asyl tuqymdy mal basy sanynyń ósimin jedeldetýge, sondaı-aq bıootyn óndirisin qoldaý men damytýǵa baǵyttalǵan», - dedi Erbol Qarashókeev.
