Senatta áleýmettik jaǵynan osal azamattardy baspanamen qamtamasyz etý máselesi kóterildi

ASTANA. QazAqparat - Senator Bekbolat Orynbekov Premer-Mınıstr Álıhan Smaıylovtyń atyna joldaǵan depýtattyq saýalynda halyqtyń áleýmettik osal toptaryn baspanamen qamtamasyz etý máseleleri men turǵyn úı sektoryndaǵy problemalardy atady, dep habarlaıdy QazAqparat tilshisi.

Depýtattyń aıtýynsha, qazirgi kezde Jambyl oblysynda 37 037 adam turǵyn úı kezeginde tursa, onyń 26 841-i halyqtyń áleýmettik osal toptarynan. Kezekte turǵandardyń sany osyndaı kóp bolǵandyqtan, senator qurylys kompanııalarynyń turǵyn úı qurylysyna qyzyǵýshylyǵynyń tómendeýine alańdaýly.

«Búgingi tańda turǵyn úı salý kezinde qalyptasyp otyrǵan negizgi problema - ol naryqtaǵy materıaldyń baǵasy. 2020 jylmen salystyrǵanda 2022 jyly orta eseppen 1,8 esege deıin ósip, smetadaǵy qunnan álde qaıda joǵary bolyp otyr. Osyǵan baılanysty merdigerlerdiń turǵyn úı qurylysyna qyzyǵýshylyǵy tómendedi», - dedi senator.

Osyǵan baılanysty depýtat Jambyl oblysynda jalǵa beriletin turǵyn úı qurylysyn qarjylandyrý qaǵıdattaryn qaıta qaraýdy jáne oblystaǵy turǵyn úıdiń 1 sharshy metriniń qunyn 220 000 teńgege deıin kóterýdi, sondaı-aq qurylys kompanııalaryna avans tóleýdi usynyp otyr.