Senatta áleýmettik kásipkerlikti damytý boıynsha zań jobasy tanystyryldy
Búgin Senat tóraǵasy Máýlen Áshimbaevtyń tóraǵalyq etýimen osy zań jobasynyń tusaýkeseri boldy. Ony Parlament depýtattary ázirlgen bolatyn.
Senat tóraǵasy qazir qoǵamnyń áleýmettik kásipkerlikke degen suranysy artyp kele jatqanyn, al osy salanyń ózi jalpy álemdik trendke aınalǵanyn atap ótti. Sonymen qatar, damyǵan elderde áleýmettik kásipkerler óz elderiniń ekonomıkasyna aıtarlyqtaı úles qosyp keledi.
«Búgin tanystyrylǵan zań jobasy áleýmettik máseleler boıynsha jumys isteıtin kásiporyndardy júıeli túrde qoldaýǵa arnalǵan. Onda áleýmettik kásipkerlik týraly negizgi túsinikter men olardyń mindetteri bekitiledi. Sondaı-aq, qujatta memlekettik qoldaýdyń naqty sharalary belgilenedi. Mundaı kásiporyndar úshin memlekettik qoldaýdyń mańyzy asa zor», - dedi Senat tóraǵasy.
Jumys toby osy zań jobasyn ázirleý barysynda 69 usynys daıyndaǵan bolatyn.
Jumys tobynyń jetekshis, senator Erik Sultanovtyń aıtýynsha, negizgi zań jobasy 3 kodeks pen 2 zańǵa 21 ózgeris pen tolyqtyrý engizýdi kózdeıdi. Onyń ishinde: Kásipkerlik kodekstegi «áleýmettik kásipker» uǵymynyń resmı anyqtamasy, sondaı-aq áleýmettik kásipker dep sanaýǵa bolatyn adamdar úshin ólshemsharttar engizý týraly negizgi tolyqtyrýlar bar.
«Negizgi 4 ólshemshart naqtylandy. Olardyń úsheýi halyqtyń áleýmettik osal toptaryn jumyspen qamtamasyz etý, olar óndirgen taýarlardy ótkizýge yqpal etý arqyly qoldaýǵa baǵyttalǵan. Tórtinshisi - qoǵamdyq-paıdaly maqsattardy jáne zańda kózdelgen salalardaǵy áleýmettik problemalardy sheshýdi kózdeıdi», - dedi senator Erik Sultanov.
Sonymen qatar, zań jobasynda áleýmettik kásipkerlik sýbektileri men óńirlik komıssııalardyń tizilimin jasaý usynylady. Dál osy komıssııalar esep, monıtorıng júrgizedi, sondaı-aq memlekettik qoldaý sharalary boıynsha sheshim qabyldaıdy. Aldaǵy ýaqytta zań jobasy Májilistiń qaraýyna engiziletin bolady.