Senatta ákimshilik ádilet máselesine arnalǵan konferentsııa aıaqtaldy
ASTANA. Sáýirdiń 13-i. QazAqparat /Qanat Mámetqazyuly/ -Búgin Parlament Senatynda eki kúnge jalǵasqan Qazaqstandaǵy ákimshilik ádileti máselelerine arnalǵan halyqaralyq ǵylymı-tájirıbelik konferentsııa aıaqtaldy. Jıyn qorytyndysyna sáıkes birqatar usynymdar qabyldandy,
dep habarlaıdy QazAqparat.
Parlament Senaty Zańnama jáne quqyqtyq máseleler komıteti men Germanııa tehnıkalyq yntymaqtastyq jónindegi qoǵamynyń qoldaýymen uıymdastyrylǵan quqyqtyq jıynǵa Armenııa, Germanııa, Grýzııa, Reseı, Ýkraınadan kelgen sarapshylar, sot júıesiniń, quqyq qorǵaý organdarynyń, ǵylymı orta men qoǵamdyq uıymdardyń ókilderi qatysty.
Demokratııalyq qoǵam men quqyqtyq memlekettiń mańyzdy belgileriniń biri - ákimshilik ádileti júıesin qalyptastyrý máseleleri boıynsha pikirsaıys aıasynda ákimshilik sheshimderine sotqa deıingi shaǵym berý, adam quqyn qorǵaýdaǵy tıimdi tetik retinde ákimshilik ádiletiniń róli, salalyq is júrgizý zańnamasyn damytý, ákimshilik quqyq buzýshylyq týraly ister boıynsha ákimshilik ádileti men sot óndirisiniń aıyrmashylyqtary týraly pikirler ortaǵa salynyp, osy baǵyttaǵy problemalar talqylandy.
Taqyryp aıasynda sóz sóılegenderdiń ishinde Germanııanyń tehnıkalyq yntymaqtastyq jónindegi qoǵamynyń «Ortalyq Azııa elderindegi quqyqtyq jáne sot reformalaryn qoldaý» jobasynyń basshysy I.Pýdelka, Májilis depýtaty R.Sarpekov, Qazaqstan Respýblıkasy Bas prokýrorynyń kómekshisi M.Jumaǵulov, D.A.Qonaev atyndaǵy ýnıversıtettiń rektory Ó.Qopabaev jáne basqalar boldy.
Talqylaýdy qorytyndylaı kelip Zańnama jáne quqyqtyq máseleler komıtetiniń basshysy B.Imashev pikirsaıysqa joǵary baǵa berdi. Jıynnyń syndarly sıpatyn atap ótken senator «barlyq eskertpeler men aıtylǵan usynystar zerdelenedi jáne osy sala boıynsha zańnamany odan ári jetildirý isine eskeriletin bolady», dedi.
