Senatta «Adam quqyqtary jónindegi ýákil týraly» zań jobasy talqylandy

NUR-SULTAN. QazAqparat -Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysynda depýtattar «Qazaqstan Respýblıkasynyń keıbir zańnamalyq aktilerine quqyq qorǵaý organdary, prokýratýra jáne sot arasynda ókilettikterdiń jáne jaýapkershilik aıasynyń arajigin ajyrata otyryp, úsh býyndy modeldi endirý máseleleri boıynsha ózgerister men tolyqtyrýlar engizý týraly» zań jobasyn talqylady. Bul týraly QazAqparat joǵary palatanyń baspasóz qyzmetine silteme jasap habarlaıdy.

Endi prokýror usynylǵan ózgeristerge sáıkes aıyptaý aktisin óz betinshe jasaı alady, sóıtip jeke jaýapkershilik arta túsetin bolady, sondaı-aq sotqa deıingi tergeý organdaryna júktemeni azaıtýǵa yqpal etedi.

Senatorlar sonymen qatar «Qazaqstan Respýblıkasyndaǵy Adam quqyqtary jónindegi ýákil týraly» zań jobasy men qoldanystaǵy zańnamalyq normalardy sáıkestendiretin ilespe 3 zań jobasyn talqylady. Qujat Memleket basshysynyń VII saılanǵan Qazaqstan Respýblıkasy Parlamenti birinshi sessııasynyń ashylýynda aıtqan tapsyrmalaryn iske asyrý aıasynda elimiz Parlamenti depýtattarynyń bastamasy boıynsha ázirlengen bolatyn.

Zań jobalary Ombýdsmenniń qyzmetin jetildirýge baǵyttalyp otyr. Onyń mártebesi, maqsaty, mindeti men qaǵıdattary, laýazymǵa saılaný jáne basqa da tártipteri aıqyndalady. 9 zańnamalyq aktige, onyń ishinde 6 kodeks pen 3 zańǵa ózgerister men tolyqtyrýlar engiziledi.

Zań jobalaryn otyrys qorytyndysy boıynsha Palatanyń qaraýyna jiberý týraly sheshim qabyldandy.