Senatormen kezdesýde qaldyqtar polıgondaryna qatysty máseleler qozǵaldy - Almaty oblysy

ALMATY OBLYSY. QazAqparat - Parlament Senatynyń depýtaty Sultan Dúısembınov Almaty oblysynyń Qaratal aýdanynda boldy, dep habarlaıdy QazAqparat joǵary palatanyń baspasóz qyzmetine silteme jasap.

Senator ortalyq aýdandyq aýrýhana men orta mektepterge kúrdeli jóndeý jumystaryn júrgizý barysymen tanysyp, merdiger uıym basshylyǵymen júrgizilip jatqan jáne alda júzege asyrylatyn jumystardy talqylady. Kezdesý barysynda osy jumystardy júrgizý úshin Memlekettik baǵdarlamalar aıasynda aýdandyq jumyspen qamtý ortalyǵynan 102 adam qyzmetke ornalasqandyǵy atap ótildi.

Sondaı-aq, Sultan Dúısembınov Tekeli qalasynda bolyp, qaladaǵy gaz taratý pýnktiniń jumysymen, halyqty aýyz sýmen qamtamasyz etetin «Tekeli Sý qubyry» kásipornynyń súzgi jáne sorǵy stantsııalarynyń jaı-kúıimen tanysty.

Depýtat Qoǵamdyq keńes múshelerimen kezdesýde Senat qabyrǵasynda júrgizilip jatqan jumystar týraly aıtty. Sonymen qatar, júzdesý barysynda Memleket basshysynyń Qazaqstan halqyna Joldaýynda aıtylǵan bastamalar talqylandy. Senator Prezıdenttiń Ulttyq quryltaı qurý týraly bastamasyna baılanysty qoǵamdyq keńesterdiń de róli men mańyzy arta túskenin atap ótti.

Senatormen kezdesýde keńes músheleri qatty turmystyq qaldyqtar polıgondaryna qatysty máselelerdiń ózektiligin aıtty.

«Bul máseleni óńirlerdi aralaý kezinde azamattar jıi kóteredi. Qatty turmystyq qaldyqtardy qaıta óńdeý jáne qoqys polıgondaryn zańnama talaptaryna sáıkes keltirý máselesin baqylaýǵa alyp otyrmyz. Men ózimniń tarapymnan bul problemany respýblıkalyq deńgeıdegi ýákiletti organdar aldynda kóteretin bolamyn», - dedi senator Sultan Dúısembınov.

Sonymen qatar, depýtat Taldyqorǵan qalasynyń tergeý ızolıatorynda bolyp, «qańtar oqıǵalaryna» baılanysty tergeý barysymen tanysty. Sultan Dúısembınov tergeý is-áreketterin júrgizý barysynda quqyq buzýshylyqtarǵa jol bermeý qajet, al oqıǵalardy baǵalaý ádil bolýǵa tıis ekenin atap ótti.