Senatorlyqqa úmitkerlerdiń mamandyqtary belgili boldy

NUR-SULTAN. QazAqparat - QR Ortalyq saılaý komıssııasynyń tóraǵasy Berik Imashev senatorlyqqa úmitkerlerdiń qatarynda qaı mamandyq ıegerleri bar ekenin aıtty, dep habarlaıdy QazAqparat tilshisi.

«Mamandyqtar boıynsha totalsaq, 19 ınjener, 13 ekonomıst, 8 pedagog, 7 agrarlyq sala qyzmetkeri, 5 dáriger, 3 zańger, 1 saıasattanýshy, sondaı-aq ekeýi basqa mamandyq ıegeri. Kandıdattar arasynda qazirgi kezde qyzmet atqaryp otyrǵan 4 senator bar. Budan basqa, kandıdattar ishinde 21 kommertsııalyq qurylym qyzmetkeri, 16 memlekettik uıymnyń, kásiporyndar men mekemelerdiń qyzmetkerleri, 12 memlekettik qyzmetshi, 5 qoǵamdyq uıymnyń ókili bar», - dedi B. Imashev QR Ortalyq saılaý komıssııasynyń otyrysynda.

Sonymen qatar ol 23 shildede saǵat 18:00-den bastap Senat depýtattyǵyna tirkelgen barlyq kandıdattar saılaý aldyndaǵy úgit-nasıhatqa kirisýge quqyly ekenin eske saldy. Úgit-nasıhat bıylǵy 11 tamyzda saǵat 00:00-ge deıin jalǵasady.

Budan buryn habarlanǵandaı, búgin QR Ortalyq saılaý komıssııasynyń otyrysynda Parlament Senaty depýtattyǵyna kandıdattardy tirkeý kezeńiniń qorytyndylary qaraldy.

2020 jylǵy 24 shildedegi jaǵdaı boıynsha elimizde Senat depýtattyǵyna saılaý komıssııalary 58 kandıdatty tirkedi. Ortasha alǵanda bir orynǵa úsh úmitker bar.

Aıta keteıik, 2014 jyly saılanǵan Senat depýtattarynyń ókilettik merzimi osy jyldyń qazan aıynda aıaqtalady. Osylaısha, 2020 jyldyń 12 tamyzynda elimizdiń joǵary zań shyǵarýshy organy joǵary palatasyna 17 óńirden bir-bir depýtattan saılanýy qajet.